Мадриднинг «Реал» клуби бош мураббийи Карло Анчелотти Испания Кубоги доирасида «Атлетик» (0:1) жамоасига қарши майдон туширилган таркиб борасида билдирилган танқидлар ҳақида гапирди.

«Ҳа, ҳақиқатдан ҳам мен бир хил футболчилардан кўп фойдаланди. Айрим футболчиларнинг майдонга кўп тушмаганликлари ҳам айни ҳақиқат.

Лекин, қайд ээтиш керакки, январь ойи биз учун оғир келди. Биз Суперкубок ва Испания Кубогида ўйнадик, бразилиялик футболчилар ўз терма жамоалари ихтиёрига кетишди.

Энди январь ойи ортда қолди, биз энди бошқа тартибда ишлаймиз. Кечаги баҳсда тўғри таркиб танладим деб ҳисоблайман. Мен машғулотларда ишлаётган йигитларни кўриб, кейин қарор қабул қиламан.

«Атлетик»ка қарши ўйинда Винисиусни майдонга тушириб бироз таваккалчиликка қўл урдим. Буни ҳақиқатдан ҳам муҳокама қилса бўлади, чунки бироз чарчоқ аломатлари борлигини билгандим.

Бошқа футболчилар ҳақида гапирадиган бўлсам, буни муҳокама қилиш шарт эмас, чунки, Каземиро ва Родриго Бразилия терма жамоасининг сўнгги ўйинида ўйнашмади  (Родриго учрашувнинг 82-дақиқасида майдонга тушган – муаллифи), марказий ҳужум позициясида эса тезкор футболчини кўришни хоҳлагандим.

Ротация - қачонги футболчиларга ишонч билдирмаётганингда юзага келади. Юқорида айтганимдек, январь ойида футболчилар чарчаганди, чунки, кўплаб ўйинлар, сафарлар, турнирлар ва жароҳатланганлар бўлди.

Февраль ойи келди ва мана энди таркибга ишонишимиз мумкин" - деди Анчелотти.