Иорданиянинг «Ал-Виҳдат» клуби бош мураббийи Бранко Смильянович, Ҳиндистоннинг «Салгокар» жамоасига қарши ОФК Кубоги гуруҳ босқичи учрашувидан сўнг, асосий мақсад – кейинги босқич йўлланмаси эканлигини қайд этиб ўтди.
«Ал-Виҳдат» – «Салгокар» учрашуви 5:0 ҳисобида Иордания клуби фойдасига ҳал бўлди. Гуруҳнинг иккинчи ўйинида эса Фарғонанинг «Нефтчи» жамоаси ўз майдонида Уммоннинг «Ал-Уруба» клубини 3:1 ҳисобида мағлуб этган эди.
«Ушбу ўйиндаги ғалаба ўз кучимизга бўлган ишончни қайтариб беради, чунки бугун биз яхши натижага эришишдан ташқари, яхши ўйин ҳам намойиш этдик. Миллий чемпионатдаги салбий натижалардан сўнг бу айниқса муҳим», деди иорданияликлар устози.
«Биз ўйин давомида тактикага бироз ўзгартириш киритдик ва бу нарса ўзини оқлади. Йирик ҳисобда ғалаба қозонганимизга қарамай, рақибларимизга ҳурмат кўзи билан қарашда давом этамиз. Биз кейинги босқич йўлланмаси учун кураш олиб бораяпмиз ва, умид қиламанки, бу вазифани бажара оламиз», дея қўшимча қилди «Ал-Виҳдат» бош мураббийи Бранко Смильянович.













