Илгари хабар берганимиздек, Рауф Инилеев етакчилигидаги Ўзбекистон U-18 Беларусь мамлакатида ўтказилаётган «Ривожланиш кубоги» деб номланган халқаро турнирда иштирок этмоқда. Вакилларимиз 2-турда "Минск" клуби ўсмирлар жамоасига қарши майдонга чиқиб, йирик ҳисобда ғалаба қозонди.

80 дақиқадан ўтказилаётган баҳсда терма жамоамиз биринчи бўлимнин ўзидаёқ рақиб дарвозасини 4 марта ишғол қилди. 34-дақиқада эса Сарварбек Адҳамов майдондан четлатилди.

Шунга қарамай, ўзбекистонликлар иккинчи бўлим бошида бешинчи голни уришган бўлса, қолган дақиқаларда беларуслар битта жавоб қайтаришди. Якуний ҳисоб — 5:1.

Эслатиб ўтамиз, Инилеев шогирдлари биринчи турда Беларусь U17 жамоасига қарши ўйинда иштирок этиб, 2:4 ҳисобида мағлубиятга учрашганди.

Ривожланиш кубоги
Ўзбекистон (ўсмирлар) - «Минск» (ўсмирлар) - 5:1
Голлар: Нурлан Ибраимов (1ʼ, 22ʼ), Муроджон Комилов (14ʼ), Улуғбек Кенжаев (24ʼ), Зайниддин Ҳамрабоев (46ʼ) — Владислав Хрекович (72ʼ-пенальти).
Четлатиш: Сарварбек Адҳамов (34ʼ)