Илҳом Мўминжонов бош мураббийлигидаги "Нефтчи" футбол клуби янги мавсумга тайёргарликни уч босқичда амалга оширишни режалаштирган эди.
Тайёргарликнинг иккинчи босқичи Туркиянинг Анталья шаҳрида ўтказилди. Ўз таркибини қатор моҳир ва тажрибали футболчилар билан кучайтирган жамоа Туркияда йиғинлар доирасида Косово, Қозоғистон ва Россия давлатларининг таниқли жамоалари билан синов-назорат учрашувларини ўтказиб, тайёргарлик жараёнининг изчил ва бўш томонларини аниқлаб олди. Фарғоналиклар 4 та беллашувдан 3 тасини дуранг ва бир учрашувни ғалаба билан якунлаб, бугун Анталья-Тошкент чартер рейси орқали юртимизга қайтиб келади.
Жамоа аъзоларига 14 февралга қадар қисқа таътил берилади. Сўнгра Фарғонада янги мавсумга тайёргарлик жараёни давом эттирилади.
