Ёшлар Лигаси, 3 тур бахсларидан сўнг ҳозирча «Локомотив» ёшлари турнир жадвалида карвонбошиликни ўз қўлларига олдилар. Клуб матбуот хизмати вакили «Навбаҳор» ва «Локомотив» жамоалари ўртасидаги учрашувдан (1:3) сўнг «Локомотив» ёшларига устозлик қилаётган Марат Валентинович билан кичик суҳбат уюштирди.

— Марат ака, «Навбаҳор» ёшларига қарши ўйиннинг биринчи бўлимида шогирдларингиз дастлаб, биринчи бўлимда — ҳимоявий, иккинчи бўлимда ҳужумкор футбол намойиш этди. Бу ўйин олдидан шогирдларингиз олдига қўйилган вазифамиди ёки вазият шуни тақозо этдими?
— Биринчидан футболчилар Тошкентдан узоқ йўл юриб келишди. Майдонни ҳис этиш, рақиб ўйинини ўрганиш учун озгина вақт керак бўлди. Биз шу куни ҳимояда бехато ўйнашга ҳаракат қилдик, яримҳимоя ва ҳимоя чизиғи яхши футбол намойиш этди. Ўзингиз биласиз, мезбонлар ҳам майдонга 3 очко илинжида чиқиб келадилар. Иккинчи бўлимда эса шогирдларим дастлаб гол урдилар, кейин пенальтини аниқ амалга ошира олмадик. Шу озгина йигитларнинг руҳиятига таъсир қилди ва биз гол ўтказиб юбордик. Аммо, футболчилар ўзларини йўқотиб қўймадилар. Натижани ўз томонларига ҳал этдилар.

— Марат ака, шогирдларингиз юртимизнинг турли ёшдаги терма жамоаларида иштирок этишади. Олдингизда яна қандай мақсад ва вазифалар турибди?
— Кечаги учрашувда биз майдонда кўплаб ёш футболчиларни яна бир маротаба маҳоратларини синаб кўрдик. Шогирдларим тўп билан муомала қилиш билан, ажойиб ҳаракатлари билан намойиш этган футбол барчага манзур келди, деб ўйлайман. Бизнинг таркибимизда бундай ёш, истеьдодли футболчилар кўп. Барча футболчиларимизга ўйин амалиётини, майдонда ўзларини ҳақиқий кучларини намоён этишларига имконият яратиб беришга ҳаракат қиляпмиз. 11 апрел куни Қозоғистон биринчи лигаси вакиллари билан ўртоқлик учрашувини ўтказишга ҳам келишиб олганмиз. Асосий мақсадимиз Ўзбекистоннинг турли ёшдаги терма жамоаларига кучли футболчиларни етказиб бериш.

Маъмур МАМАДАЛИЕВ суҳбатлашди.