Хабарингиз бор, айни кунларда «Турон»нинг асосий таркиб жамоаси Тошкент шаҳрида ўқув-йиғин машғулотларини олиб бормоқда. Бугунги машғулотлар якунида клуб матбуот хизмати яқиндаги жамоа сафига келиб қўшилган иқтидорли ҳимоячи Абдуғани Камоловнинг фикрлари билан қизиқди.

— Абдуғани, дастлаб жамоа мухлисларига «Турон»га келиб қўшилишингиз ҳақида маълумот берсак. Айтингчи, бу жараён қандай юз берди?

— Авваламбор, ассалому алайкум. Менга «Турон» клуби бош директори Собир Хамидов ва жамоа бош мураббийи Анвар Бердиевлар таклиф билан чиқишди. Улар билан ўзаро суҳбатлашдик, жамоа олдидаги режалар хусусида батафсил гаплашдик. «Турон» ўз олдига узоқ муддатга мўлжалланган истиқболли мақсадларни қўйганлиги менда қизиқиш уйғотди. Кўпроқ ўйин амалиётига эга бўлиш, жамоани Суперлигага қайтаришга ўз ҳиссамни қўшиш мақсадида клуб билан шартнома имзоладим.

— Жамоада қайси футболчи билан кўпроқ яқиндан дўст тутиндингиз?

— Жамоада ҳамма билан бир хил яқинмиз. Айни вақтда «Турон»да аҳил жамоа шаклланмоқда. Барча футболчилар бир-биримиз билан ака-укадекмиз.

— Жамоа машғулотлари дастлаб клуб қароргоҳида ташкил этилган бўлса, эндиликда Тошкент шаҳрида навбатдаги ўқув-йиғин жараёни давом этмоқда. Мазкур йиғинлар доирасида ўртоқлик учрашувлари ҳам ташкил этилмоқда. Бу борада фикрингиз қандай?

— Дастлабки йиғин доирасида жамоамиз машғулотларида асосан жисмоний тайёргарликка, тикланишга эътибор қаратилди. Жисмоний тайёргарликни ошириш жараёни ҳозир ҳам давом этмоқда. Назорат учрашувларида жамоамиз футболчилари бир-бирларини тушунишларида муаммоларга дуч келишаётгани йўқ. Биз ўйинларга чанқоқ холатдамиз. Жамоамиз таркиби истеъдодли футболчилардан шакллантирилди. Олдимизда янги мавсум якунида Суперлига йўлланмаси асосий мақсад сифатида қўйилган. Барча футболчилар ушбу мақсад йўлида аҳиллик билан астойдил ҳаракат қилишга шай холатда.

— «Навбаҳор» ва «Сўғдиёна»га қарши ўртоқлик ўйинларида жамоа кучли рақибларга муносиб қаршилик кўрсата олди. Ушбу учрашувлар хусусида нималарни айта оласиз?

— «Навбаҳор»га қарши ўйинда жамоамиз ёмон ўйнагани йўқ. Аксинча тўп назорати биз кўпроқ устунликка эга бўлдик. “Сўғдиёна»га қарши баҳсда ҳам жамоамиз ўзини кўрсата олди. Олдинда бажаримиз лозим бўлган ишлар кўп, ҳаракат қилишда давом этамиз. Мавсум бошлангунига қадар тўлиқ тайёр бўламиз деб ўйлайман.

— Жамоа бош мураббийи Анвар Бердиев футболчилик даврида моҳир ҳужумчи бўлган. Шундан келиб чиқса, жамоа ўйин услубини шакллантиришда кўпроқ ҳужумкорликка урғу берилмоқдами?

— Жамоамиз бош мураббийи бизни ҳар бир ўйинга ўзимизга бўлган ишонч ва агрессив кайфиятда чиқишга ўргатмоқда. Ҳар бир вазиятга, ҳар бир тўпга ўта эътибор билан муносабатда бўлишга ундаяпти. Ҳозирда турлича ўйин услублари бўйича ишлаяпмиз. Учрашувлар давомида фақат олдинга интилиш, ҳар бир беллашувга ғалаба учун чиқиш, тўп узатишларда ўта аниқлик билан ҳаракат қилиш каби вазифалар зиммамизга юклатилган. Жамоанинг ҳар бир машғулотлари қувноқ кайфиятда ўтмоқда.

— Жамоага қанчалик мослашиб улгурдингиз? Умуман бу ердаги яратиб берилаётган шароитлар ҳақида фикрингиз қандай?

— Жамоага тўлиқ мослашиб кетдим деб айта оламан. Бу ерда ҳамма футболчилар ўзаро ака-укадекмиз. «Турон»даги шароитлар ҳақида айтадиган бўлсам, тўғриси бу ерда футбол учун яратиб берилган имкониятлар баъзи Суперлига клубларида ҳам йўқ. Яқинда клубнинг Европа стандартлари асосида барпо этилаётган замонавий базаси фойдаланишга топширилиши кутилмоқда.

— Бу йилги Про-лига мусобақаларида 10 та жамоа иштирок этади. Қайси жамоаларни Суперлига йўлидаги асосий рақиблар деб кўрсатган бўлардингиз?

— Бу йилги Про-лига аввалгиларидан ҳам қизиқарли ўтиши кутилмоқда. «Андижон», «Машъал», «Бухоро», «Шўртан» каби номдор жамоаларга қарши ўйнаймиз. Биз бошқа жамоаларга эътибор қаратмасдан ўз ўйинимизни ўйнаймиз ва ҳар бир ўйинда ғалаба учун майдонга чиқамиз. «Хоразм», «Арал-Самали», «Янгиер», «Зомин», «Ғиждувон» жамоаларини кучсиз деб ҳисоблаш нотўғри бўларди. Улар ҳам ўтган мавсумларда ўзларини ҳар томонлама кўрсата олишди. Умуман айтганда ҳар бир ўйин осон бўлмайди.