Европа лигаси ушбу ном билан қайта ташкил этилганидан буён "Барселона" илк марта мазкур мусобақада иштирок этмоқда. Жамоа Еврпоа чемпионлар лигаси гуруҳ босқичида 3-ўринни эгаллагани учун Европа лигасига ўтди. Қуръада "кўк-анорранглилар"га "Наполи" дуч келди.

Неаполликлар яхши ҳимояланиш билан бирга рақибга нисбатан яхшироқ шаклланганини намойиш эта бошлади. Шу боис, "Барса" "Наполи" мудофаасини ёриб ўтишга қийналди. Баҳснинг 29-дақиқасида ҳимоячининг хатосидан сўнг Обамеянг тўпни эгаллаб Торресни яккама-якка вазиятга чиқариб юборди. Аммо Ферран 15 метрлардан дарвоза томон аниқ зарба бера олмади. Италияликлар эса кейинги ҳужумдаёқ мезбонлар дарвозасини ишғол қилишди. Қанотдан ерлатиб берилган узатмани Зелински қабул қилди ва кучли зарба берди. Тўп тер Штегенга тегиб қайтди, Пётрнинг ўзи тўпни дарвозага жойлаб қўйди.

"Барса" иккинчи таймда майдонга ўзгача иштиёқ билан тушиб келди ва рақибга босим ўтказа бошлади. Ўйиннинг 58-дақиқасида Траоре ўнг қанотдан меҳмонлар жарима майдонига кирди ва дарвоза яқинига узатма бераётганида тўп унинг олдида турган ҳимоячининг қўлига тегди. Ҳакам VARнинг эслатмасини тинглаб, видеотакрорни томоша қилгач, "Наполи" дарвозаси томон пенальти белгилади. Ферран Торрес эса ундан самарали фойдаланиб, ҳисобни тенглаштирди.

Шундан кейин ҳам неаполликлар бутун жамоа бўлиб ҳимояланишда давом этишди. "Барселона" ижросидаги голга тортадиган энг хавфли вазият эса 88-дақиқада юзага келтирилди. Каталонияликлар қисқа паслар билан рақиб жарима майдонига кириб келишди, Ферран Торрес эса 6-7 метрлардан дарвозага аниқ зарба бера олмади. Тўп юқорига кўтарилиб кетди. 90-дақиқада эса Люк де Йонг қайчи услубида хавфли зарба йўллади. Зарбага бироз аниқлик етишмади.

Ўйинга қўшиб берилган дақиқаларда Ферран бугунги ўйинда учинчи ўта қулай вазиятни йўққа чиқарди. Люк де Йонг томонидан берилган чиройли узатмадан сўнг испаниялик футболчи яна аниқ зарба йўллай олмади.

Шу тариқа, "Наполи" ўзининг ягона имкониятидан фойдаланган бўлса, "Барселона" вазиятларни голга айлантира олмасдан дурангга имзо чекди. Жавоб учрашуви бир ҳафтадан кейин Неаполь шаҳрида бўлиб ўтади.

Европа лигаси, 1/16 финал, дастлабки ўйин
Барселона Испания – Наполи Италия 1:1 (0:1)
Голлар: 0:1 – 29 Зелиньски, 1:1 – 59, пенальти Ферран Торрес.
Барселона – тер Стеген, Мингеса (Дест, 81), Пике, Эрик Гарсия, Альба, де Йонг (Бускетс, 65), Нико Гонсалес (Гави, 65), Педри, Обамеянг (де Йонг, 86), Траоре (Дембеле, 65), Ферран Торрес.
Наполи – Мерет, Ди Лоренцо, Кулибали, Ррахмани, Жезус, Зелиньски (Демме, 80), Фабиан Руис, Замбо-Ангисса (Малькюи, 84), Элмаз (Мариу Руй, 85), Инсинье (Унас, 72), Осимхен (Мертенс, 80).
Огоҳлантиришлар: Замбо-Ангисса (39), Фабиан Руис (70), Мерет (90).