Yevropa ligasi ushbu nom bilan qayta tashkil etilganidan buyon "Barselona" ilk marta mazkur musobaqada ishtirok etmoqda. Jamoa Yevrpoa chempionlar ligasi guruh bosqichida 3-o‘rinni egallagani uchun Yevropa ligasiga o‘tdi. Qur’ada "ko‘k-anorranglilar"ga "Napoli" duch keldi.

Neapolliklar yaxshi himoyalanish bilan birga raqibga nisbatan yaxshiroq shakllanganini namoyish eta boshladi. Shu bois, "Barsa" "Napoli" mudofaasini yorib o‘tishga qiynaldi. Bahsning 29-daqiqasida himoyachining xatosidan so‘ng Obameyang to‘pni egallab Torresni yakkama-yakka vaziyatga chiqarib yubordi. Ammo Ferran 15 metrlardan darvoza tomon aniq zarba bera olmadi. Italiyaliklar esa keyingi hujumdayoq mezbonlar darvozasini ishg‘ol qilishdi. Qanotdan yerlatib berilgan uzatmani Zelinski qabul qildi va kuchli zarba berdi. To‘p ter Shtegenga tegib qaytdi, Pyotrning o‘zi to‘pni darvozaga joylab qo‘ydi.

"Barsa" ikkinchi taymda maydonga o‘zgacha ishtiyoq bilan tushib keldi va raqibga bosim o‘tkaza boshladi. O‘yinning 58-daqiqasida Traore o‘ng qanotdan mehmonlar jarima maydoniga kirdi va darvoza yaqiniga uzatma berayotganida to‘p uning oldida turgan himoyachining qo‘liga tegdi. Hakam VARning eslatmasini tinglab, videotakrorni tomosha qilgach, "Napoli" darvozasi tomon penalti belgiladi. Ferran Torres esa undan samarali foydalanib, hisobni tenglashtirdi.

Shundan keyin ham neapolliklar butun jamoa bo‘lib himoyalanishda davom etishdi. "Barselona" ijrosidagi golga tortadigan eng xavfli vaziyat esa 88-daqiqada yuzaga keltirildi. Kataloniyaliklar qisqa paslar bilan raqib jarima maydoniga kirib kelishdi, Ferran Torres esa 6-7 metrlardan darvozaga aniq zarba bera olmadi. To‘p yuqoriga ko‘tarilib ketdi. 90-daqiqada esa Lyuk de Yong qaychi uslubida xavfli zarba yo‘lladi. Zarbaga biroz aniqlik yetishmadi.

O‘yinga qo‘shib berilgan daqiqalarda Ferran bugungi o‘yinda uchinchi o‘ta qulay vaziyatni yo‘qqa chiqardi. Lyuk de Yong tomonidan berilgan chiroyli uzatmadan so‘ng ispaniyalik futbolchi yana aniq zarba yo‘llay olmadi.

Shu tariqa, "Napoli" o‘zining yagona imkoniyatidan foydalangan bo‘lsa, "Barselona" vaziyatlarni golga aylantira olmasdan durangga imzo chekdi. Javob uchrashuvi bir haftadan keyin Neapol shahrida bo‘lib o‘tadi.

Yevropa ligasi, 1/16 final, dastlabki o‘yin
Barselona Ispaniya – Napoli Italiya 1:1 (0:1)
Gollar: 0:1 – 29 Zelinski, 1:1 – 59, penalti Ferran Torres.
Barselona – ter Stegen, Mingesa (Dest, 81), Pike, Erik Garsiya, Alba, de Yong (Buskets, 65), Niko Gonsales (Gavi, 65), Pedri, Obameyang (de Yong, 86), Traore (Dembele, 65), Ferran Torres.
Napoli – Meret, Di Lorenso, Kulibali, Rraxmani, Jezus, Zelinski (Demme, 80), Fabian Ruis, Zambo-Angissa (Malkyui, 84), Elmaz (Mariu Ruy, 85), Insinye (Unas, 72), Osimxen (Mertens, 80).
Ogohlantirishlar: Zambo-Angissa (39), Fabian Ruis (70), Meret (90).