«Ливерпуль» бош мураббийи Юрген Клопп Жеймс Милнернинг клуб билан якунланган шартномаси ҳақида фикр билдирди.

Немис мутахассиси тажрибали футболчи билан шартномани узайтирмоқчи эканлигини айтди.

«Милнер менинг биринчи кунимдан бери клубда. Усиз бу натижаларнинг барчасига қандай эришган бўлардим, билмайман. "Ливерпул"ни Милнерсиз тасаввур ҳам қила олмайман», - дея Клоппнинг сўзларидан иқтибос келтирмоқда Фабрицио Романо.

Эслатиб ўтамиз, ярим ҳимоячининг клуб билан шартномаси 2022 йилнинг ёзида якунига етади ва томонлар ҳалигача янги шартнома имзолашмаган. Британия матбуотига кўра, «Ливерпуль» Милнерга янги шартнома бўйича таклиф билан чиққан, бироқ футболчининг ўзи ҳамон жавоб бермаган.

Милнер жорий мавсумда «Ливерпул» сафида 25 та ўйинда майдонга тушди ва 3 та голли узатмани амалга оширди.

Олдинроқ Чемпионлар лигаси доирасидаги «Интер»га қарши ўйин Милнер учун фаолиятидаги 800-ўйин бўлгани ҳақида хабар берилганди.