Роман Абарамовичга шу ҳафта охиригача «Челси»ни сотиб юбориш таклиф қилинди.

The Telegraph нашрининг ёзишига қараганда, Лондоннинг "Челси" клубини учта харидор сотиб олишга тайёр. Абрамович ҳафта охиригача таклифларни олиши кутилмоқда.

Россиялик миллиардер санкциялар таҳдидига дуч келгани учун биринчи марта клубни сотиш ҳақида ўйлашни бошлади.

Аввалроқ «Челси» раҳбарияти клуб сотилмаслигини айтган бўлса, энди Абрамовичда бошқа танлов қолмаслиги мумкин, деб ҳисобланмоқда.

«Челси»ни сотишдаги қийинчилик шу бўлиши мумкинки, агар Абрамович шу ҳафта охиригача санкцияга учраса, харидорлар россиялик миллиардер ёки унинг вакиллари билан келишувга эриша оладими, деган саволга ойдинлик киритишни кутишлари мумкин.

Абрамович аввалроқ клубни 2,2 миллиард фунт стерлингга сотиш таклифини рад этганди.

Айни пайтда «Челси» Роман Абрамовичдан 1,51 миллиард фунт қарздор.