“Шўртан” - “Металлург” жамоалари ўртасидаги баҳсдан сўнг мезбонлар бош мураббийи Игорь Криушенко ўйин ҳақидаги фикрлари билан ўртоқлашди. Криушенко жамоасининг хатолари мағлубиятга сабаб бўлганини таъкидлаб ўтди.

«Аввало, бугунги рақибларимизни ғалаба билан табриклайман! Бугун шогирдларим бир қатор хатоларга йўл қўйишди, буни эса рақиб кечириб ўтирмади. Иккинчи голни эса ёш болаларча ўтказиб юбордик. Бу ерда ҳимоячилар ва дарвозабонни айблаш мумкин. Мен доим гапириб келганман – ютуқ ҳам, мағлубият ҳам жамоаники. Жамоа бугун ишончли ўйин намойиш эта олмади».

«Ҳали иккинчи даврада бўладиган “Металлург” - “Шўртан” жамоалари ўртасидаги баҳсгача ҳали анча вақт бор. Шунинг учун, биз олдимизда турган ўйинларга жиддий тайёрланишимиз керак. Кейинги тур “Бухоро” билан ўйнаймиз ва сафардан ғалаба билан қайтиб келишга ҳаракат қилиб, мухлисларимизни хурсанд этамиз».

«Тўғри, агар бугун ғалаба қозонишганимизда биринчи ўринга кўтарилиб олардик. Аммо, ҳозир биринчи ўрин ҳақида гапириш нотўғри. Ҳали чемпионат олдинда, шунинг учун ўрин ҳақида мавсумнинг сўнгги учрашувида гапириш мумкин».