Туркиялик тадбиркор Муҳсин Байрак яқин вақт ичида «Челси»ни сотиб олиш бўйича шартнома имзолашини айтди.
«Биз Роман Абрамовичнинг адвокатлари билан «Челси»ни сотиб олиш шартларини муҳокама қилмоқдамиз. Музокаралар якуний босқичида. Тез орада Лондонда турк байроғини кўтарамиз. Биз яқин орада шартнома имзолашни режалаштирмоқдамиз», - дея Байракнинг сўзларини келтиради FanNation.
Олдинроқ Абрамович «Челси»ни сотиш қарорини малум қилганди. У клубни сотишдан тушган барча соф даромадларни хайрия қилиш учун хайрия жамғармасини яратишини айтганди.
Абрамович клубни 2003 йилда сотиб олганидан бери лондонликлар барча мумкин бўлган совринларни қўлга киритишди: беш марта Англия кубоги, уч марта Лига кубоги, икки марта Чемпионлар лигаси ва Европа лигаси, шунингдек, УЕФА Суперкубогин ҳам ўзиники қилди.
