15 апрель куни Эрон футзал терма жамоаси билан 2:2 ҳисобида дуранг ўйнаган Ўзбекистон футзал терма жамоаси ҳунук анъанага чек қўйди. Бунга қадар ўтказилган барча учрашувларда эронликларнинг қўли баланд келган бўлса, 10 карра Осиё чемпионига қарши сўнгги ўйин илк дуранг натижа билан интихо топди.
17 апрель куни Тошкент вақти билан 18:00да Эронга қарши иккинчи назорат ўйини бўлиб ўтади. Хосе Мария Мендез мураббийлигида 25 май куни старт оладиган Осиё чемпионатига тайёргарлик кўраётган терма жамоа дарвозабони Рустам Умаров Эронга қарши дастлабки ўйин таассуротлари билан ўртоқлашди.
Эронга қарши ўйин кутилганидек осон кечмади, - дея гап бошлади Умаров. – Эронликларнинг кучига шубҳа қилиб бўлмасди. Якунда бундай кучли рақибга қарши дуранг қайд эта олганимиздан жуда хурсанд бўлдик.
- Ўйинга бўлган тайёргарлик қандай бўлди?
- Биз эронликлар иштирокидаги ўйинлар видеоёзувини томоша қилиб, рақибни пухта ўрганиб чиқдик. Бунда бош мураббий Мендез хизматини алоҳида таъкидлаган бўлардим, наздимда у аъло даражадаги мутахассис. Шунингдек кучли назариячи ва психолог ҳамдир. Мендез Эрондек кучли рақибга қарши ўйинда қандай ҳимояланиш кераклигини тушунтира олди. Шу билан баробар Эрон сафидаги ҳар бир футболчини ўрганиб чиқди.
- Ўртоқлик ўйинини томоша қилиш учун беш мингдан зиёд мухлислар ташриф буюришини кутмаган бўлсангиз керак?
- Зал ҳаддан ташқари дим бўлгани учун, нафас олишнинг ўзи муаммо бўлиб қолди. Залга кондиционер ўрнатилмагани бизни ҳайрон қолдирди. Қизиқ томони, чигалёзди машғулотларни якунлаётган пайтимиздаёқ залдаги босим бизни бўғиб қўйганди. Шунингдек мезбонларни қўллаб-қувватлаб турган маҳаллий мухлисларни ҳам таъкидлаш керак. Улар зал атрофини тўлдириб, ўз жамоаларини етарлича қўллаб-қувватлаб туришди. Ҳар бир футболчини исми-шарифи билан алоҳида эслашди. Айниқса Шамсаи номини кўп бор тилга олишди. Агар Вохид Шамсаи ҳам ўйинда иштирок этганида, эронликлар энг жаговор таркиб ҳосил қилган бўлишарди. Масалан шу куни рақиб дарвозасини Эрон футзали афсоналаридан бири Мустафо Назари қўллаб-қувватлади. Умумий ҳисобда рақибнинг бир ҳил савиядаги 3та тўртлиги бор эди.
- Эрон терма жамоаси беллашувда иккита гол фарқи билан олдинга чиқиб олганига қарамай, Ўзбекистон футзал терма жамоаси уни дуранг билан ниҳоялади...
- Бу борада ҳам мураббий кўрсатмаси катта рол ўйнади. Масалан, биз ўйинни нормал бошладик. Мураббий кўрсатмаси бўйича рақибни прессингда ушлашга ҳаракат қилдик. Табиийки, улар бундай қаршиликка тайёр эмасдилар. Кейин кўрсатма бўйича ҳимояланишни бошладик. Асосийси ўйинчилар бир-бирини тўлдириб туриши керак эди. Албатта бу якунда қониқарли натижага сабаб бўлди. Мураббий руҳий томондан ўзига ишонаётгани кўриниб турарди ва бу ҳолат жамоа аъзоларига ҳам кўчиб ўтди. Биринчи бўлимда 1та гол ўтказиб юбордик. Бор йўғи бир марта эътиборсизликка йўл қўйдик ва бу қимматга тушди. Рақибнинг шундай хатоларидан биз ҳам унумли фойдаланишимиз мумкин эди, бироқ ҳужумни аниқ якунлаш насиб қилмади. Иккинчи бўлимда Мендез ўз кучимизга ишонишимиз учун керагича кўрсатма берди. Айтиб ўтганимдек, бу борада у яхши руҳшунос ҳам бўла олди. Хаттоки Эрон иккинчи голни киритганда ҳам бизда ўз кучимизга ишонч йўқолмаганди. Шуҳрат Тожибоевнинг ажойиб пасини Нодир Элибоев голга айлантиргач, жамоада ишонч янада ортди. Озгина ўтиб Константин Свиридов тўпни чап қанотда қулай вазиятга чиқиб бораётган Холмуҳамедовга етказиб берди. Олег эса биргина уриниш билан ҳисобни тенглаштирди. Мувозанат тиклангач, эронликлар дарҳол ҳужумга ўтишди, бироқ биз энди ўйин якунига қадар туриб бера олдик. Ўйлашимча, ҳисоб ҳаққоний бўлди. Чунки биз кам хато қилдик.
Ўйин якунига етгач, Мендезнинг кайфияти чоғ эди. Бироқ мураббий буни яққол кўрсатиб қўймасликка ҳаракат қилди. У ҳар биримизни алоҳида табриклади. Энди биз биринчи ўйин видеоёзувини томоша қилиб, мазкур рақибга қарши такрорий ўйин учун тайёргарлик бошлаймиз. Эрондаги тайёргарлик якунига етгач, Тошкентга қайтиб келиб, май ойининг бошида асосий йиғин учун Испанияга жўнаб кетамиз. Европадан эса Осиё чемпионатида иштирок этиш учун БААга йўл оламиз. Қитъа чемпионатида муносиб иштирок этиб, жаҳон чемпионати йўлланмасини қўлга киритишга ҳаракат қиламиз.
ЎФФ матбуот хизмати
