Каталонияликлар ҳимоячиси Даниэл Алвес Европа чемпионлар лигаси ярим финалининг "Челси" - "Барселона" учрашуви олдидан интервью берди. Шунингдек, Даниэл бундан 3 йил муқаддам жамоаларнинг айнан ярим финалдаги учрашувини ҳам ёдга олди. Ўшанда икки ўйин натижасига кўра "Барселона" финалга чиққанди.
"Сўзсиз, ўшанда "Челси"га қарши жавоб ўйини (1:1) жуда қийин ўтганди. Ҳакамнинг хатоси эвазига "Челси" мағлубиятга учрагани ҳақида гап-сўзлар кўпайиб кетганди. Аммо бу бизнинг муаммомиз эмас, ҳакамларни биз бошқармаймиз. Майдонга футбол ўйнагани чиқамиз, финалга етиб бориш учун бор кучимиз билан курашамиз. Биз ҳакамларни нима қила олардик?
"Челси" финалга қўрқув туфайли чиқа олмаган. Ўз уйида ўйнаётган жамоада устунлик бўлиши керак ва ҳужумлар уюштириши шарт. Албатта, агар сен ҳужумда ўйнамасанг ва буни "Барселона" амалга оширса, охир-оқибат ютқазишинг тайин. Олдинга интилсанг, ғалабага эришасан. Ўйлашимча, ўшанда "Челси"нинг ҳужумга ўтиши учун футболчиларда дадиллик етишмаган. Ва улар бунинг учун жазоланишган эди", - дейди Алвес The Guardian нашрига берган интервьюсида.
