“Насаф” Суперлиганинг 2-турида Бекободнинг “Металлург” жамоасини қабул қилади. Ушбу баҳс 9 март куни соат 18:30 бошланади. Учрашувдан олдин эстрадамизнинг ёрқин юлдузи Шоҳруҳҳон ўз чиқишлари билан сиз азиз мухлисларни хушнуд этади. Концерт дастури соат 16:00 да бошланади.
Ўзаро учрашувлар тарихидан
Жамоалар Ўзбекистон чемпионатида шу вақтга қадар 48 бор куч синашишган. Бўлиб ўтган 30 учрашувда “аждарлар”, 12 ўйинда эса бекободликлар зафар қучишган. 6 учрашувда эса дуранг натижа қайд этилган.
Тўплар нисбати 79:38 га тенг. Устунлик қаршиликлар тарафида.
Ўзаро учрашувларда қайд этилган энг юқори ҳисоблар қуйидагича:
“Насаф“ – “Металлург” 7:0,
“Металлург” – “Насаф” 3:0.
Жамоалар сўнгги ўзаро учрашувни 2021 йили 15 октябрь куни Қаршида ўтказган. Бу учрашувда "Насаф" минимал 1:0 ҳисобида ғалаба қозонган.
Эътиборингизга, жамоалар иштирокидаги сўнгги беш учрашувнинг натижаларини ҳавола қиламиз:
15.10.2021 Насаф — Металлург 1:0
23.06.2021 Металлург — Насаф 2:1
26.10.2020 Металлург – Насаф 0:2
06.07.2020 Насаф — Металлург 1:0
31.07.2019 Насаф — Металлург 1:2
