Дубайнинг "Аш-Шабоб" клуби яримҳимоячи Азиз Ҳайдаров билан шартномани узайтирмасликка қарор қилди. БААнинг "The National " газетаси клубга яқин манбаларга таяниб тарқатган хабарга кўра, Ўзбекистон миллий терма жамоаси аъзоси Дубай клуби "кўтара олмайдиган" даражада маош талаб қилган.

Клубдаги манбага кўра, Азиз Ҳайдаров яна бир мавсум "Аш-Шабоб"да ўйнаш учун 2 миллион доллар (7,34 миллион дирҳам) маош сўраган.

Аввалроқ, "Аш-Шабоб" клуби директори Убайд ал-Ҳубайза Ҳайдаровда бир қатор бошқа жамоалардан таклифлар борлигини ва ўзбекистонлик футболчи янги шартнома бўйича якуний қарорни қабул қилиш учун вақт сўраганини маълум қилганди.

"Агар у бизнинг таклифларимизга рози бўлмай, жамоамиздан кетадиган бўлса, биз унинг қарорини қабул қиламиз ва бошқа яхши футболчи излаймиз. Биз учун, у қанчалик кучли бўлишидан қатъий назар — футболчи эмас, жамоа манфаати устун", — деганди ал-Ҳубайза.

"Аш-Шабоб" бош мураббийи Пауло Бонамиго эса Ўзбекистон терма жамоаси аъзоси мавсумнинг қолган ўйинларида муҳим роль ўйнашини айтиб ўтганди. "Мавсум ҳали якунига етгани йўқ ва Ҳайдаров ҳали ҳам жамоамиз аъзоси", — деганди бразилиялик мутахассис.

Тасдиқланмаган хабарларга кўра, мавсум якунига етгач, Ҳайдаров фаолиятини давом эттириш учун Дубайнинг бошқа бир жамоаси, афсонавий футболчи — Диего Марадона қўл остидаги "Ал-Васл" клубига ўтиши мумкин. Бироқ "Ал-Васл" матбуот котиби бу борадаги миш-мишларга изоҳ беришдан бош тортган.

26 ёшли Азиз Ҳайдаров 2011-йилнинг июль ойида Тошкентнинг "Бунёдкор" жамоасидан БААнинг "Аш-Шабоб" клубига ўтган. Футболчи БАА Про-лигасида доирасида 16 учрашувда, БАА Кубоги доирасида эса 6 учрашувда майдонга тушган ва 2 та гол уришга муваффақ бўлган. Ҳайдаров "Бунёдкор" сафида 155 ўйинда иштирок этиб, 9 та гол урган. Ўзбекистон миллий терма жамоаси сафида 41 ўйинда майдонга тушган.