«Аякс» ярим ҳимоячиси Райан Гравенберх «Бавария»га ўтиши мумкин, дея хабар беради журналист Фабрицио Романо.

Манбага кўра, Мюнхен клуби бош директори Оливер Кан Монакодаги учрашувда футболчининг агенти Мино Райола билан 19 ёшли голландиялик футболчини трансфер қилиш имкониятини муҳокама қилган.

Қайд этилишича, «Аякс» футболчи учун тахминан 30 миллион евро олишни кутмоқда, ярим ҳимоячининг ўзи немис клубига ўтишга қарши эмас.

2021/22 йилги мавсумда Гравенберх «Аякс» таркибида 34 та ўйинда майдонга тушиб, 1 та гол ва 4 та голли узатмага муаллифлик қилган. Трансфермаркт портали футболчининг нархини 35 миллион еврога баҳоламоқда.