«Ayaks» yarim himoyachisi Rayan Gravenberx «Bavariya»ga o‘tishi mumkin, deya xabar beradi jurnalist Fabrisio Romano.

Manbaga ko‘ra, Myunxen klubi bosh direktori Oliver Kan Monakodagi uchrashuvda futbolchining agenti Mino Rayola bilan 19 yoshli gollandiyalik futbolchini transfer qilish imkoniyatini muhokama qilgan.

Qayd etilishicha, «Ayaks» futbolchi uchun taxminan 30 million yevro olishni kutmoqda, yarim himoyachining o‘zi nemis klubiga o‘tishga qarshi emas.

2021/22 yilgi mavsumda Gravenberx «Ayaks» tarkibida 34 ta o‘yinda maydonga tushib, 1 ta gol va 4 ta golli uzatmaga mualliflik qilgan. Transfermarkt portali futbolchining narxini 35 million yevroga baholamoqda.