Ўзбекистонлик ҳакамлар ОФК Президенти Кубогининг Тожикистонда бўлажак гуруҳ баҳсларида иштирок этмайдиган бўлишди.
 
2012 йилнинг 5-9 май кунлари Тожикистоннинг Душанбе ва Турсунзода шаҳарларида ОФК Президенти Кубоги «С» гуруҳи ўйинлари ўтказилиши режалаштирилган. ОФК маълумотига кўра, баҳсларда иштирок этувчи клублар таркибида ўзгариш юз берган. Унга кўра, Шри-Ланканинг «Ратнам» клуби мусобақада иштирок этмайдиган бўлган. «С» гуруҳида, мезбон «Истиқлол» жамоасидан ташқари, Туркманистоннинг «Балкан» ва Фаластиннинг «Марказ Шабаб» клублари ҳам ўрин олган.
 
Тожикистондаги саралаш баҳслари иштирокчилари сони учтагача қисқарганидан сўнг, ОФК мусобақага таклиф этилган ҳакамлар гуруҳини ҳам қисқартиришга қарор қилган. Шу муносабат билан, ўзбекистонлик бош ҳакам Владислав Цейтлин ва ён қанот ҳаками Ҳусниддин Шодмонов Тожикистондаги мусобақада иштирок этмайдиган бўлишди. Бундан ташқари, вьетнамлик комиссар Нгуен Мин Нгок ва кувайтлик ён қанот ҳаками Фарис аш-Шаммарий ҳам Тожикистонга бормайди.
 
2012 йилги ОФК Президенти Кубогида, Шри-Ланка вакили чиқиб кетганидан сўнг, 11 мамлакат — Бангладеш, Бутан, Камбоджа, Хитой Тайпейи, Қирғизистон, Мўғулистон, Непал, Покистон, Фаластин, Тожикистон ва Туркманистон клублари ғолиблик учун кураш олиб бормоқда. Жамоалар дастлаб уч гуруҳга бўлиниб, финал босқичи йўлланмаси учун кураш олиб боришади. Гуруҳ ўйинларига, Тожикистондан ташқари, Покистон ва Камбоджа мезбонлик қилмоқда. Сентябрь ойида бўладиган финал босқичида эса гуруҳларда дастлабки икки ўринни эгаллаган олти жамоа иштирок этади.