Ўзбекистон миллий терма жамоаси аъзоси Одил Аҳмедов Россияда чоп этиладиган «Спорт-Экспресс» газетаси версиясига кўра «Анжи»нинг «Спартак» (Москва)га қарши ўйинида энг яхши футболчи деб топилди.

Россия Премьер-лигаси 40-тури доирасида «Лужники»да «Спартак» меҳмони бўлган Гуус Хиддинк шогирдлари йирик – 3:0 ҳисобида устун келишди. Учрашувни тўлиқ – 90 дақиқа ўтказган Аҳмедов Самуэль Это‘О томонидан киритилган биринчи голга ассисентлик қилди. Шу билан бирга ўз амлуасида ажойиб ўйин кўрсатди. «Спорт-Экспресс» мутахассислари Одил Аҳмедовни 7 баллга лойиқ кўришди. Унинг жамоадошларидан бирортаси ҳам бу каби юқори балл ола билмади.

Мамлакатдаги машҳур интернет сайтларидан бири football.kulichki.ru Аҳмедовни тур рамзий терма жамоасига киритгани эътиборга молик. Аҳмедов билан бир қаторда Игорь Акинфеев, Бенуа Ангбва, Тарас Бурлак, Роман Шаронов, Николай Марков, Балаж Джуджак, Звездан Мисимович, Андрей Аршавин, Ласина Траоре, Самуэль Это‘о каби футболчилар ҳам 40-тур рамзий терма жамоасидан жой олишди.  

Маълумот ўрнида қайд этиш жоиз, Аҳмедов Россия Премьер-лигасининг жорий мавсумида 39та учрашувда майдонга тушиб, 1та гол киритишга муваффақ бўлган ва 6 марта огоҳлантирилган.