«Сўғдиёна»нинг ОФК кубоги гуруҳ босқичида рақибларидан бири — Туркманистоннинг «Олтин аср» клуби қишки трансфер пайтида бир нечта футболчилар билан шартнома имзолади.

Жамоа Туркманистон терма жамоаси дарвозабони Батир Бабаевни ўз сафига қўшиб олган. Ушбу посбон ўтган мавсумда «Небитчи» шарафини ҳимоя қилганди.

Бундан ташқари, «Миграция» футзал клуби ўйинчилари Руслан Тажиев ва Арслан Сапаров билан шартнома имзоланди.

Шунингдек, ўтган мавсумда "Шагадам" сафида тўп тепган ҳимоячи Мовламберди Гошшанов Туркманистоннинг амалдаги чемпиони сафига ўтди. «Олтин аср» сафига яна бир қатор ёш футболчилар ўтганини таъкидлаш лозим.

ОФК кубоги "E" гуруҳида "Олтин аср" ва "Сўғдиёна"дан ташқари, «ЦСКА- Памир» (Тожикистон) ва «Нефтчи» (Қирғизистон) клублари ўрин олишган. Гуруҳ босқичи ўйинлари июнь ойи сўнгида Душанбе шаҳрида ўтказилади.

Мазкур гуруҳ ғолиби Марказий Осиё минтақаси ғолиблиги учун «F» гуруҳи ғолиби билан тўқнаш келади. Минтақа ғолиби кейинги босқичга чиқиш билан биргаликда 100 минг доллар миқдорида мукофот пули олади.

"Олтин аср" клуби Туркманистоннинг 8 карра чемпиони ҳисобланади. Жамоа 2005 йилдан буён ОФК кубоги мусобақасида иштирок этиб келади. Клуб 2018 йилда финалгача етиб бориб, ҳал қилувчи баҳсда Ироқнинг «Эйр Форс» клубига ютқазган (0:2).