"Барселона" ҳимоячиси Херард Пике ЕЧЛ ярим финали жавоб учрашуви арафасида каталонияликлар жамоаси ҳужумчиси Лионель Месси ва лондонликлар ҳужумчиси Дидье Дрогбага баҳо бериб ўтди.
"Рақибимиз "Барселона"нинг ҳужум салоҳияти ҳақида билишади. Тўғри, Мессининг бунда иштироки жуда катта, бироқ гап жамоа ҳақида боряпти. "Барселона" таркибида гол уриб, ўйиннинг боришини ўзгартириб юбора олдаиган бошқа футболчилар ҳам бор. Мессига қандайдир боғланиб қолиш борлигига шахсан мен ишонмайман.
Дрогба? У билан майдонда кўп дуч бўлганман. Дидье – мен кўрган энг яхши футболчиларнинг бири. У мукаммал ўйинчи. У кўп йиллардан бери юқори даражада ўйин намойиш этиб келмоқда.
Сешанба куни унга қарши ўйнаш мен учун осон бўлмайди, албатта, агар майдонга чиқадиган бўлсам. Унинг биринчи ўйиндаги қилиқлари учун танқид қилавермаслигимиз керак. Агар у яна шундай ўйин кўрсатса, ўйлаб кўрамиз… Лекин мен Дрогбанинг соф ўйинчи эканлигига ишонаман", – дея Пике сўзларидан иқтибос келтирмоқда Goal.com.
"Барселона" – "Челси" учрашуви бугун "Камп Ноу" стадионида Тошкент вақти билан соат 23:45 да бошланади.