Жозе Моуриньо – футбол тарихидаги энг совриндор мураббийлардан бири. Аммо бу, унинг мукаммал эканини англатмайди. У ҳам фаолияти давомида кўплаб хатоларга йўл қўйган. Моуриньода талантларни яхши фарқлай олиш қобилияти бор. Шу билан бирга у кўп юлдуз футболчиларидан айрилган. Бугун биз португалнинг "хатолари"дан тузилган рамзий терма жамоага кўз ташладик.
Дарвозабон: Петр Чех
Чех Моуриньонинг "Челси"даги дастлабки даврида ўта керакли фигура бўлган. Аммо португалиялик мутахассис унинг ўрнига 2015 йилда Тибо Куртуани олиб келади. Чех "Челси"нинг ашаддий рақибларидан бири бўлган "Арсенал"га йўл олиб, у ерда бир нечта титулларга эга чиқади.
Ўнг қанот ҳимоячиси: Глен Жонсон
Жонсон Моуриньонинг биринчи "Челси"сида ўз имконини кутиб яшади. Аммо унга ён берилмади ва 2007 йилда 4 миллион фунт эвазига "Портсмунт"га сотиб юборилди. У шундан кейин АПЛдаги энг яхши ҳимоячилардан бирига айланди. Жонсон "Ливерпуль"да ўз чўққисига эришган эди. Футболчи 2010 ва 2014 йилги Жаҳон чемпионати, шунингдек, 2012 йилги Еврода Англия шарафини ҳимоя қилган.
Чап қанот ҳимоячиси: Филипе Луис
"Челси" Луисни 2014 йилда "Атлетико"дан харид қилади. Аммо футболчи Лондонда анча қийинчиликларга дуч келган. У бир мавсумда атиги 9 та АПЛ учрашувида қатнашиб, 2015 йилда яна Мадридга қайтиб кетади. Бразилия терма жамоаси аъзоси Испанияда юқори чўққига чиққан. У 2018 йилда Европа лигасида чемпион бўлган эди.
Марказий ҳимоячи: Давид Луис
Моуриньо "Челси"га атиги бир мавсумга қайтади. Аммо ўша қайтиш давомида жамоанинг ишончли вакилидан бири бўлган Давид Луисни "ПСЖ"га 50 миллион фунт эвазига сотиб юборилишига сабаб бўлади. Ҳимоячи Парижда икки мавсум давомида икки бор Франция чемпиони бўлади. Луис 2016 йилда "Челси"га қайтиб, 2017 йилда Конте билан АПЛни ютган эди.
Марказий ҳимоячи: Леонардо Бонуччи
Моуриньо 2009 йилда "Интер"га таклиф этилади. У жамоага келган заҳотиёқ Бонуччини ўз стандартларидан йироқ футболчи деб ҳисоблаб, арзимаган пул эвазига "Женоа"га бериб юборади. Марказий ҳимоячи 2010 йилда "Ювентус"га йўл олади. Ундан кейин нималар бўлганини эса ўзингиз яхши биласиз. У ҳозирда Италиянинг миллий қаҳрамонларидан бирига айланган.
Ярим ҳимоячи: Кевин Де Брюйне
Де Брюйнега "Челси"да деярли имкон берилмайди. Бунга Моуриньо йўл қўймаган эди. Бельгиялик футболчи "Вольфсбург"га сотиб юборилган. Кевин 2014-15 йилги мавсумда Бундеслиганинг энг яхши ўйинчиси деб топилади. Шундан сўнг уни "Манчестер Сити" сотиб олади. Де Брюйне ҳозирга қадар дунёнинг энг зўр футболчиси бўлишга улгурди.
Ўнг томон вингери: Муҳаммад Салоҳ
Бу борада ортиқча изоҳ бериб ўтиришнинг фойдаси йўқ. Жозе Моуриньо мисрликни сотиб юбориб, умридаги энг катта хатони бўйнига илган...
Ярим ҳимоячи: Хуан Мата
Биз Матани рўйхатдан четда қолдира олмаймиз. Чунки у "Челси"даги феноменал ўйинлари билан ёдимизда қолган. Йил ўйинчиси мақомига бир неча бор сазовар бўлган ярим ҳимоячи 2014 йилда "МЮ"га сотиб юборилади. Ўшанда муҳлислар Моуриньонинг бу қароридан ҳайратга тушган. Мата "қизил иблислар" сафида ўз даражасига қайта чиқа олмади.
Чап қанот вингери: Арьен Роббен
Роббен Жозе Моуриньонинг "Челси"даги дастлабки йилларида муваффақиятли ҳаракат қилади. Аммо нима ҳам бўлди-ю, Моур уни "Реал"га сотиб юборди (24 миллион фунт). Испаниядаги икки мавсумдан кейин, Роббен "Бавария"га йўл олади ва у ерда 10 йил давомида ҳақиқий машҳурликка эришади.
Ҳужумчи: Ромелу Лукаку
Моуриньо қўл-остида энг муваффақиятсиз натижа қайд этган футболчи бу Лукаку эди. Атиги 3 та ўйиндан кейин, ҳужумчи "Эвертон"га 28 миллион фунтга пуллаб юборилади. Бельгиялик "Гудисон Парк"да Моуриньо катта хатога йўл қўйганини исботлаб берди. Айнан шу сабаб ҳам "special one" уни 2017 йилда "МЮ"га олиб келган эди. Лукаку "МЮ", "Интер", ҳозир эса яна "Челси" либосини кийди.
Ҳужумчи: Ибрагимович
Ибрагимович Моуриньо ўз жамоасида олиб қолишга ҳаракат қилган камсонли футболчилардан биридир. Аммо швециялик ҳужумчи "Барселона"дан келган таклифни рад эта олмайди ва 2009 йилда Каталонияга йўл олади. Испаниядаги омадсиз мавсумдан кейин, Ибра кўп жамоаларда ўйнаб кўрди. Улар ичида "ПСЖ", "ЛА Гэлакси", "МЮ", ҳамда "Милан"лар мавжуд. Ҳозирда 40 ёшни қарши олган футболчи Италия чемпиони бўлишга жуда яқин турибди.
инглиз тилидан Жалолиддин ИСМАТОВ таржимаси
