Аргентина терма жамоасининг собиқ ҳужумчиси Габриэль Батистута молиявий муаммоларга дуч келди.

Clarin нашри маълумотларига кўра, унинг банк ҳисоблари музлатилган, Аргентинадаги қимматли қоғозлари ва кўчмас мулкларига тақиқ қўйилган.

У умумий қиймати салкам 4 миллион песо солиқ тўлашдан бўйин товлаганликда айбланмоқда. У солиқ тўлаганида, жарима ҳам тўлаши керак бўлади. Бу умумий сумманинг 15 фоизи ҳисобланади. Бундан ташқари, ижтимоий солиқлар ҳам бор.

Аргентина пандемия даврида бадавлат фуқаролар учун махсус ижтимоий солиқ жорий қилди.

2019 йилда Аргентина терма жамоасининг собиқ ҳужумчиси Габриэль Батистута тўпиғида юзага келган муаммо сабабли, протез қўйдирганди.

Батистута Европада Италиянинг «Фиорентина», «Рома» ва «Интер» клубларида ўйнаган. Терма жамоа таркибида 77 та ўйин ўтказиб, 54 та гол урган, икки марта Америка кубогини, бир марта Конфедерациялар кубогини қўлга киритган.