3 июнь куни ЖЧ-2014 IV саралаш босқичи ўйинлари старт олади. Ўзбекистон жой олган «А» гуруҳида мазкур санада Ливан Қатарни қабул қилса, Эрон миллий терма жамоаси Тошкентда меҳмон бўлади. «В» 1-турда Иордания – Ироқ ҳамда Япония – Уммон ўйинлари ўтказилади.
ОФКнинг саралашда иштирок этаётган мамлакат футбол федерацияларига жўнатган мактубига кўра, 1-турда майдонга тушадиган терма жамоалар 27 май куни футболчилар рўйхатини ташкилотга тақдим этиши керак. Регламентга кўра, қолган тур ўйинларига ҳам 7 кун муддат қолганида мамлакат футбол федерациялари футболчилар рўйхатини ОФКга жўнатади.
Маълумот ўрнида қайд этиш керак, Вадим Абрамов мураббийлигидаги Ўзбекистон миллий терма жамоаси Эронга қарши ўйин олдидан 22 май куни Тошкентда тўпланади.
