Кеча сайтдаги конферениямга келган саволларга жавоб бераётиб, Англия Премьер Лигасида чемпионни аниқлашда эътибор бериладиган кўрсаткичлар қаторига ўзаро ўйинлар натижасини ҳам киритиб юборгандим ва икки жамоа ўртасида тенглик юзага келиши мумкинлигини имконсиз баҳолагандим. Сабаби, “Манчестер Сити” ва “Манчестер Юнайтед” ўртасидаги илк ўйинда меҳмонлар 6:1 ҳисобида ғалаба қозонгандилар.

Маълум бўлишича, АПЛ регламентига кўра, икки ва ундан ортиқ жамоалар бир хил очко тўпласалар, ўзаро ўйинларга умуман эътибор берилмас экан.

Демак, жамоаларнинг жадвалдаги ўрнини аниқлашда,

1) тўпланган очколар

2) урилган ва ўтказиб юборилган голлар фарқи

3) урилган голлар сони

каби кўрсаткичлар мезон сифатида хизмат қилади холос.

Энг қизиғи, Манчестернинг икки клубининг бир хил очко тўплаш эҳтимоли мавжуд. Агар “шаҳарликлар” душанба куни Фергюсон шогирдларини мағлуб эта олсалар, очколар тенглашади ва тўплар нисбатига кўра биринчи ўринга қайтадилар. Аммо яна икки тур борлигини ва тўплар нисбатидаги фарқ у қадар катта эмаслигини эътиборга олсак, бу жиҳатдан ҳам жамоалар тенглашиб олишлари мумкин.

35-тур олдидан “МЮ” да тўплар нисбати 86-32, “Манчестер Сити”да эса, 87-27. “Юнайтед”нинг дербидан кейинги рақиблари бироз енгилроқ (“Суонси”, “Сандерленд”) ва “Сити”ники қийинроқ (“Ньюкасл”, “КПР”) эканини эътиборга олсак. Ҳар нарса бўлиши мумкин.

Агар бу икки жамоанинг тўплаган очкоси, тўплар нисбати ва урган голлари бир хил бўлиб қолса, регламентга кўра ҳар икки жамоага битта ўрин берилади. Қўшимча ўйин ўтказилмайди. АПЛ да қўш чемпионлик эълон қилинади. 

Қ.Асланов