Беларусь чемпионатининг ҳар бир турида "Ҳалол ўйин" соврини ўз эгасига топшириб борилади. "Энергетик-БГУ" клуби ҳужумчиси Бобур Абдухолиқов 1-тур якунлари бўйича ушбу соврин соҳибига айланди.

Ғолиб номини аниқлаш мақсадида мухлислар ўртасида сўровнома ўтказилди. Ҳамюртимиз ушбу сўровномада Иван Бахар ва Владислав Малькевични ортда қолдирди. Бобурга совға топширилди.

Абдухолиқов 1-турда "Витебск" клубига қарши ўйинда 2та гол муаллифига айланди. Бундан ташқари, рақиб футболчилари унга нисбатан ишлатилган қўполликларни ортиқча ҳиссиётсиз ва ғазабсиз қарши олди.

Ўзбекистонлик футболчи совринни қабул қилиб олгач, кичик интервью берди.

– "Fair Play" совринини қўлга киритиш, албатта, жуда ёқимли. Менга овоз берганларнинг барчасига миннатдорчилик билдираман. Ўзбекистонлик кўплаб мухлислар мени қўллаб-қувватлашганини кўрдим. Барчага салом йўллайман. Бундан кейиy ҳам яхши, самарали ва ҳалол ўйиним орқали мухлисларни хурсанд қилишга ҳаракат қиламан.

Жаҳонда "Fair Play" совринини қўлга киритган ёрқин намоёндалар? Бирданига ёдимга келмади. Аммо ҳалол ва масъулиятлик ўйин — ҳар қандай спорт турининг муҳим бўлаги ҳисобланади.

– «Энергетик»нинг ўйини ҳақида. Жамоа ҳар икки ўйинда 3:1 ҳисобида ғалаба қозонди. Сиз эса голлар уриб, ассистентлик қилдингиз. Жамоа ниманинг эвазига яхши натижалар қайд этмоқда?
– Жамоамизда яхши ва ёш йигитлар йиғилган. Ҳар бир баҳсда ғалаба учун ўйнашга ҳаракат қиляпмиз. Хатоларимиз бор, аммо биз ўйиндан ўйинга уларни бартараф этишга ҳаракат қиляпмиз.

Менинг шахсий мақсадим? Ҳар бир ўйинда гол уриш ва голли узатмалар бериш. Ҳар сафар имкон қадар кўпроқ ва кўпроқ.