"Навбаҳор"-"Бухоро" (1:1) учрашуви якунлангач ҳар икки жамоа мураббийлари ўртасида матбуот анжумани бўлиб ўтди.

Мустафо БАЙРАМОВ ("Навбаҳор" бош мураббийи):
— Ўйин жанговар руҳда бўлди. Бу ўйинга яхши тайёрланган эдик, охиригача курашдик. Ўйин охирида эса бизга омад кулиб боқмади, ҳимоядаги эътиборсизлигимиз бизни 3 очкодан маҳрум этди. Йигитлар бугун ғалаба учун майдонга тушишган эди. Бу — футбол, майдонда ҳар нарса бўлиши мумкин.

— Нима деб ўйлайсиз? Балки "Бунёдкор" билан бўлиб ўтган ўйиндан сўнг йигитлар ўзларига юқори баҳо бериб юборишгандир?
— Йўқ, бундай бўлиши мумкин эмас. Бугунги ўйинга ҳам алоҳида тартибда тайёргарлик кўрган эдик. Айтдим-ку, ўйин охиридаги эътиборсизлик бизга қимматга тушди, охиригача ўйнаш керак эди.

— “Навбаҳор” ўйинга тайёр эмасдек туюлди?
— Нега? Бугун биз ҳаракат қилдик, “Бухоро” ҳам яхши жамоа. Улар ҳам майдонда яхши ҳаракат қилишди. Меҳмонларимиз Андижонда ҳам ғалаба қозонишган. Бизнинг ўйинга муносабатимиз жиддий эди. Лекин бу футбол, ғалаба қозонишни хоҳлаган эдик. Лекин буни амалга оширолмадик. Тушунинглар, бугун оғир ўйин бўлди. Бунақа ўйинлар бўлиб туради.

— Дуранг бугунги ўйинга мос эдими?
— Яна қайтараман, бугун биз ғалаба қозонишимиз керак эди. Бизда Бойдадаев тўпни ошириб берган вазиятда Фоменкода вазият бўлди, Санжарда яхши вазият бўлди. Аммо гол бўлмади.

— Темур Султоновни Абдулазиз Султоновга алмаштирилишини қандай изоҳлайсиз?
— Темур чарчаб қолди ва хатоларга йўл қўя бошлади. Ўнг қанотдан ҳужумларни кучайтириш мақсадида Абдулазизни туширдик. Олдин у ерда Ғайрат ўйнарди, лекин ҳозир у ҳужум чизиғида. Биз ҳужумни кучайтириш мақсадида шу ишни амалга оширдик. Ўз устимизда ишлашда давом этамиз ва "Олмалиқ" билан ўйинда мухлисларни хурсанд этишга ҳаракат қиламиз.