«Манчестер Юнайтед» ҳужумчиси Криштиану Роналду собиқ жамоадоши Уэйн Рунининг танқидларига жавоб берди.

Куни кеча Руни «Манчестер Юнайтед»даги вазиятни таҳлил қилар экан, Роналдунинг трансфери ўзини оқламаганини айтди. 37 ёшли португалиялик футболчи 32 ўйинда 18 та гол урган ва ҳозирда «Юнайтед»нинг мавсумдаги энг яхши тўпурари бўлиб турибди, бироқ жамоа кутилганидан паст натижа кўрсатиб, Премьер-лига жадвалида 7-ўринни эгаллаб, ЕЧЛ йўлланмасидан қуруқ қолиш арафасида турибди.

Роналду Рунининг инстаграмдаги суратига изоҳ қолдирди. Суратда Руни «Ливерпуль»нинг собиқ футболчиси Жейми Каррагер ва бошловчи Девид Жонс билан бирга тушган.

«Икки ҳасадгўй одам», - деди Роналду. Эҳтимол у нафақат Руни, балки Каррагерни ҳам назарда тутган.

36 ёшли Руни Роналдудан ёшроқ, аммо профессионал футболчи сифатидаги сўнгги ўйинини 2020 йил 25 ноябрда ўтказди. Ҳозирда у «Дерби Каунти» бош мураббийи ҳисобланади.