Осиё Чемпионлар Лигаси 1-тури доирасида кечган «Пахтакор» — «Сепаҳон» учрашувидан кейин эронликлар устози Муҳаррам Навидкия ўз фикрлари билан ўртоқлашди.

"Жамоам бу ўйинда ҳақли равишда ғалаба қозонди. Лекин айрим фактларни келтириб ўтишим керак. Мисол учун, биринчи бўлимни жуда ёмон ўтказдик. Тактик томондан ҳам ўйинимиз кўнгилдагидек чиққани йўқ. Аммо футболчилар иккинчи бўлимда ўзига келди ва яхши ҳаракат қилди. Бир қанча имкониятга эга бўлди. Бундан ҳам йирикроқ ғалабага эришишимиз мумкин эди. Тўпни кўпроқ назорат қилиб рақиб ярим ҳимоясидаги бўшлиқларни кўрдик.

Навбатдаги ўйинларга қадар тезроқ муаммоларимизни ҳал қилиб олишимиз даркор. Яъни юқорида айтганимдек учрашувнинг дастлабки қисми борасида ишлашимиз зарур. Учрашувга тайёргарлик жараёнида жарима зарбалари устида ишлаганимизни айтиб ўтишим керак. Рақиб иштирокидаги ўйинларнинг видеоларини кузатиш чоғида жарима зарбалари, стандарт вазиятларда хатоларга йўл қўйишини, бундан фойдаланишимиз мумкинлигини айтдим", — деди Муҳаррам Навидкия.

Эслатиб ўтамиз, «Пахтакор» кейинги турни «Ат-Таъвун»га қарши ўтказади. «Сепаҳон» эса «Ад-Дуҳайл» билан ўйнайди.