Аввал хабар қилганимиздек, бугун эрталаб пойтахтимиз Тошкентдан йўлга отланган “Насаф” футбол клуби делегацияси куннинг иккинчи ярмида Бирлашган Араб Амирликлари пойтахти Абу Даби шаҳрига етиб келди.

Футболчиларимиз дастлаб Тошкент-Дубай ҳаво йўналиши орқали 3 соатдан ошиқроқ давом этган парвоздан сўнг Араб Амирликларнинг энг машҳур шаҳри - Дубайга етиб келишди. Сўнгра Дубайдан Абу Дабигача автобусда йўлга отланишди. Маҳаллий вақт билан соат 15:00 да жамоамиз аъзолари ўзлари учун ажратилган меҳмонхона – “Grand Millenium” га жойлашишди.

Бугун кечки пайт футболчиларимиз БАА пойтахтида ўзларининг илк машғулотларини ўтказишади. Эртага “Насаф” ва “Ал-Жазира” жамоаси бош мураббийлари ва етакчи футболчилари иштирокида матбуот анжумани ўтказилиши режалаштирилган.

Эслатиб ўтамиз, ОЧЛнинг 5-туридан ўрин олган “Ал-Жазира” – “Насаф” учрашуви 2 май, сешанба куни Тошкент вақти билвн соат 20:45 да бошланади.