Ўзбекистон кубоги мусобақасининг гуруҳ босқичи 2-туридан ўрин олган "Машъал" - "Ғиждувон" (0:0) учрашувидан сўнг мезбонлар бош мураббийи Дилявер Ваниев матбуот анжуманида иштирок этди.
- Бугунги учрашув ҳақида айтадиган бўлсам, қизиқарли ўйин гувоҳига айландик. Ҳар икки жамоа ҳам фаоллик кўрсатди. Ўз ўйинимиздан қониқиш ҳосил қилган ва қониқмаган жиҳатларим бор. Хавфли вазиятлар яратиш борасида жамоамиз вакиллари жуда яхши ҳаракат қилишди. Бироқ ҳужумларни якунлашда хатоликларга йўл қўйдик.
- Ўтган турда Ғиждувон" шу майдонда "Қўқон-1912"га йирик ҳисобда мағлуб бўлганди. "Машъал" ҳам Суперлига ҳавосидан баҳраманд бўлган клуб. Нега "Ғиждувон" бугун мағлуб этилмади?
- Ҳозир бизда футбол яхши ривожланиб бораяпти. Ҳеч бир натижани олдиндан айтиш қийин. Масалан кеча "Зомин" Суперлига вакили "Локомотив" билан 2:2 ҳисобида ўйнади. "Ғиждувон" ёмон жамоа эмас. Балки уларнинг натижалари чемпионат доирасида ёмонроқ кўринаётгандир. Жиддий таҳлил қилсангиз, бу жамоа Про-лиганинг навбатдаги тур учрашувларида ҳар қандай жамоага "бошоғриқ" бўла олади.
- Захирадан ўйинга қўшилган футболчиларнинг ўйинларидан қониқдингизми?
- Биз захирадан 2004 йилда туғилган футболчиларни майдонга туширдик. Академиямиз тарбияланувчиларига имконият бераяпмиз, уларга ўйин амалиёти ва тажриба керак.
- Украиналик легионернинг ўйини ҳақида фикрингиз қандай?
- Микола Агапов анча муддат футболдан четда қолган, машғулотлар ўтказмаган. ФИФА украиналик футболчиларга трансфер борасида имконият бергач, у таркибимизга келиб қўшилди. Ўйиндан-ўйинга мослашиб боради. Тўпни ўзида сақлаши, вазиятлар яратиши билан алоҳида ажралиб турди. Биз унга майдондаги тактик вазифаларини ҳам тушунтириб бораяпмиз.
