Хабарингиз бор, айни кунларда Ўзбекистон U-16 терма жамоаси янги мураббий - Жамолиддин Раҳматуллаев бошчилигида Тошкентда йиғин ўтказмоқда. Мазкур жамоа олдида бир қатор муҳим турнирлар кутиб турибди. Хусусан, вакилларимиз жорий йилда Осиё чемпионати саралаш босқичида муваффақиятли қатнашиши, шунингдек, 2023 йил ўтказиладиган U-17 Жаҳон чемпионатида иштирок этиши мақсад қилинган.

ЎФА биринчи вице-президенти Равшан Эрматов мазкур нуфузли мусобақаларга тайёргарлик режалари билан танишиш, янги мураббийлар штаби ва футболчилар билан суҳбатлашиш мақсадида машғулотларга ташриф буюрди.

Учрашувда ЎФА томонидан футболчиларимизнинг олдинда турган турнирларга сифатли ва тизимли тайёргарлик кўришлари учун барча шароитлар яратиб берилиши маълум қилинди.

Равшан Эрматов футболчилар билан суҳбатда мазкур турнирларга жиддий тайёргарлик кўриш, бунинг учун ҳар куни ўз устида ишлаш зарурлигини таъкидлаб, терма жамоа аъзоси бўлиш ҳар бир футболчи учун шараф ва азалий орзуси эканлигига эътибор қаратди. Бу борада ҳозирданоқ профессионализм, интилиш ва меҳнатсеварликни ўзида мужассам қилиб бориш кераклигини айтди.

Ушбу жамоани мусобақаларга тиббий, жисмоний, руҳий, техник ва тактик томондан тайёргарлик олиб бориш бўйича мураббийларга топшириқлар берилди.