Кеча тунда бўлиб ўтган ва "Реал"нинг йирик ғалабаси билан якунланган учрашувдан кейин Испан ОАВда ўйин якунида юз берган можаро ҳақида турли миш--мишлар авж ола бошлади.
Гап шундаки, ўйин якунланиб бўлгач, "Атлетик" ярим ҳимоячиси Хави Мартинес ҳамда "Реал" юлдузи Криштиану Роналдулар ўртасида даҳанаки жанг бўлиб ўтган. Ушбу вазият акс этган сурат ва видеолар ҳамма ёққа тарқалиб кетган.
Ўйин пайтида майдондан қизил карточка олиб четлатилган Хави Мартинес Криштиану Роналдунинг ёнидан ўтиб кетаётганида уни симулянт деб атаган. Португалиялик юлдуз эса "Биз испания чемпионимиз" дея қўлини юқорига кўтарганича Мартинесга жавоб қайтаради.
Бунга жавобан эса Хави Мартинес: "Мен жаҳон чемпиониман, сенга эса ҳали бор" дея жавоб қайтарган. Иккала футболчи ўртасида бошланиб кетган даҳанаки жангни воқеа жойига етиб келган "Реал" физиотерапевти Руи Фария ажратиб қолган.
Мазкур воқеа бутун испан ОАВда муҳокама қилинаётгани боис, Испания Футбол Федерацияси ҳам буни назардан қочирмаган.
Маълумотларга қараганда ҳар иккала футболчининг ҳатти-ҳаракатлари ИФФ томонидан ўрганиб чиқилади. Иккала футболчи эса ушбу ҳатти-ҳаракатлари учун Испания чемпионатининг бир нечта ўйинларидан четлатилиши ҳам мумкин, дейди AS нашри.
