"Барселона" "Айнтрахт"га қарши ўйиндаги воқеалардан кейин чипта сотиш усулини ўзгартиради.

Каталонияда бўлиб ўтган Европа лигаси ўйинига (2:3) немис клубининг кўплаб мухлислари ташриф буюришди - турли ҳисоб-китобларга кўра, улар сони 20 мингдан 30 минггача бўлган.

"Барселона" президенти Жоан Лапортанинг айтишича, энди клубнинг Европа мусобақаларидаги ўйинларига сотиладиган чипталар шахсийлаштирилади.

Шунингдек, Лапорта немис жамоасининг минглаб мухлислари "Камп Ноу"га қандай етиб келганини тушунтириб берди.

“Сотувда 34 440 та чипта бор эди. Чекловлар бор эди, чипталарни немис банк картаси ёки немис IP`си билан сотиб олиш мумкин эмас эди. Клуб немисларга чипта сотмаган.

Аммо чипталарни сотиб олганлар ўшанда немис мухлисларига совға қилгани ҳақида далиллар бор”, — деди “Барселона” президенти.