«Тоттенхэм» клуби «Брентфорд» ярим ҳимоячиси Кристиан Эриксенни қайтариш ҳақида ўйламоқда. Бу ҳақда Football Insider нашри хабар бермоқда.
Манбага кўра, даниялик футболчи ҳам собиқ клубига қайтишга қарши эмас. Шунингдек, айни пайтда «шпорлар» устози ҳисобланган Антони Конте собиқ шогирдини ўз жамоасида кўришни истамоқда. Эслатиб ўтамиз, ўтган мавсум Конте Ва Эриксен «Интер» жамоасида бирга ишлаган.
30 ёшли даниялик 2013 йилдан 2020 йилгача Лондон клубида ўйнаган ва «Тоттенхэм» либосида 305 ўйин ўтказиб, 69 гол ва 90 голга ассистентлик қилган.
Эриксен қишки трансфер ойнасида «Брентфорд»га келиб қўшилди ва яна бир йилга узайтирилиши шарти билан мавсум охиригача шартнома имзолади. Кристиан янги жамоаси сафида олтита учрашувда бир гол ва иккита голли узатмани амалга оширди.
