Олдин ҳам бу ҳақида кўп гапирганмиз – Англия кубоги футбол тарихидаги энг қадимий турнир. Унда Бирлашган Қиролликдаги профессионал футбол клубларининг ҳаммаси иштирок этиш ҳуқуқига эга. Мусобақада қатнашиш, албатта молиявий томондан фойдалидир. Англия Футбол ассоциацияси мусобақанинг ҳар бир босқичи учун алоҳида пул мукофотлари белгилаган. Бу эса клублар учун яхшигина фойда олиш имкониятини беради. Ушбу даромад пастки лига жамоалари учун катта ёрдам бӯлади. Шу билан бирга АПЛ вакиллари ҳам турнирда узоқроққа бориш орқали каттагина рағбатга эга чиқади. «Уэмбли»да эса бош совринни кўтариш орқали энг йирик пул мукофотини қўлга киритиш мумкин...
Англия кубогининг 2021-22 йилги мавсуми илк босқичларида қатнашган ва ғалаба қозонган клубга 1,125 фунт мукофот белгиланган. Ҳатто мағлуб бўлган томон ҳам қуруқ қўйилмайди. Улар 375 фунт билан сийланган. Босқичлар янгилангани сайин мукофотлар ҳам йириклашади. Хусусан, биринчи раунднинг ғолиблари бу мавсумда 22,629 фунт ютишга муваффақ бўлган. Мағлублар эса ўз ҳаққини ярим финал ҳамда финал баҳсларидан кейин олишади.
Мусобақанинг учинчи босқичида АПЛ ва Чемпионшип жамоалари тўқнаш келса, ғолиб томонга 82,000 минг фунт мукофот тақдим этилади. Шу зайлда, жамоалар янги босқичга чиққани сайин молиявий рағбатлар ҳам ошиб боради. Жумладан, финалга етиб келган жамоа ғолибликни қўлга киритса, 1,8 миллион фунтга эга бўлади. Ушбу клубнинг мавсум давомида фақатгина ФА кубоги турнирида қўлга киритган умумий маблағи 3 миллион 412 минг фунтни ташкил этади. Финалдаги мағлуб клуб ҳам қуруқ қолдирилмайди. Улар ҳам 900 минг фунт билан сийланади. Мағлуб жамоа Англия кубоги давомида йиғган умумий суммаси эса 2 миллион 512 минг фунтга тенг бўлиши кўзда тутилган (2021-22 йилги мавсум учун).
Англия аёллар футболидаги айни шу мусобақанинг муқобили яқин йиллар ичида танқид остида қолмоқда. Бунга асосий сабаб эса мукофот пулларининг эркакларники каби кўп эмаслигидир. Хусусан, аёллар жамоаси турнирнинг биринчи босқичида ғалаба қозонса, 850 фунтга, мағлуб эса 215 фунтга эга чиқади (эркакларники билан солиштиринг!). Тўртинчи босқичда ғалабага эга бўлган клуб бор-йўғи 2000 фунт ютиб олади. Мағлуб эса – 500 фунт (жуда кулгили сумма). Финал босқичидаги зафарнинг нархи 25 минг фунт қилиб белгиланган. Умумий ҳисоблаганда, финалга чиққан аёллар клублари ғолибининг мавсумий даромади 39 минг, мағлубники эса 29 минг фунтни ташкил этади ( фақат ФА кубоги турнирида).
Бироқ Англиядаги жамоатчилик ва тегишли ташкилотларнинг босими билан мусобақа ташкилотчилари аёллар турнирига кейинги мавсумдан умумий қиймати 3 миллион фунтга тенг бўлган мукофот пули қўйишни режалаштирмоқда. Бу эса катта ижобий ўзгаришларга сабаб бўлади.
Жалолиддин ИСМАТОВ таржимаси
