Норвегия чемпионатининг бешинчи дивизиони ўйинларининг бирида қизиқ ҳодиса рўй берди: Ҳакам бир футболчини ўзига ишлатилган қўполлик учун белгиланган пенальтига қаршилик қилгани учун четлаштирди.
"Сандвед" жамоасининг ҳужумчиси Талат Абуним "Лид" жамоаси жарима майдончаси ичида йиқилиб тушади. Футболчи ўзининг оёғига чалкашиб йиқилгани ҳақида ҳакамга айтмоқчи бўлганда у аллақачон 11 метрли нуқтани кўрсатиб турганди. Абунима бундай адолатсизликка чидолмаслигини айтади.
Футболчи қаршилик қилавергач, ҳакам Недзад Муньич унга сариқ карточка кўрсатади. Абунима эса қаршилик қилишда давом этаверади ва иккинчи сариқ карточкани ишлаб олади.
"Бу тоза пенальти эди. Ўйинчининг ўзи нима бўлганини сезмади. Футболчиларнинг ҳаммаси ҳам қоидаларни билади деб ўйламайман. Мен ҳуштак чалгандим, қароримни ўзгартиролмасдим", - дейди ҳакам Муньич.
Кейинроқ Норвегия ҳакамлар ассоцияцияси раҳбари Руне Педерсеннинг фикри қуйидагича бўлди: Ҳакам қарорини ўзгартирмаслиги керак эди, аммо футболчининг четлаштирилиши - ортиқча.
Қўшимча қилиб қўйиш керакки, Абуним четлаштирилгандан кейин "Лид" жамоаси ўйинчиларнинг сонини тенглаштириб қўйиш учун бир ўйинчисини майдондан чиқариб олди.
