Россиянинг «Нижний Новгород» клуби ҳимоячи Иброҳимхалил Йўлдошев билан шартномани узайтирди. Бу ҳақда клуб расмий сайти хабар тарқатди. 21 ёшли футболчи 3 йилга мўлжалланган шартномага имзо чекди.

«Йўлдошев – иқтидорли ва келажаги порлоқ футболчи. У Ўзбекистон миллий жамоаси аъзоси ҳисобланади. Ушбу мавсумда у Россия чемпионатига мослашиб олди. Уни мухлисларимиз яхши кўришади ва ҳурмат қилишади. Бош мураббийимиз унга тўла ишонади. Иброҳимхалил инсонийлик жиҳатдан ўзининг фақат яхши жиҳатларини намоён этмоқда. Биз унга янада ўсишини ва жамоамиз сафида ўйинларда муваффақиятга эришишини тилаймиз!» — деди «Нижний Новгород» клуби бош директори Равиль Измайлов.

Йўлдошев жорий мавсумда «Нижний Новгород» сафида 17та ўйинда иштирок этиб, бир гол ва икки ассист муаллифига айланди.