Барчага аёнки, Ромелу Лукаку келаётган ёзда ўз клубини тарк этишга тайёр бўлади. Бунга сабаб эса, ҳужумчи ўзи учун сарфланган маблағларни оқлай олмаганидир. Бельгия терма жамоаси аъзоси учун «ПСЖ» ҳамда «Интер» қизиқиш билдирган ва «Челси» уни исталган нархга сотиб юбориши мумкин. Бу нарса айримларни ҳайратга солар, ҳархолда, 97,5 миллион фунтни фақат 12 ой учун сарфлаш осон бўлмайди. Аммо бу – «Челси». Клуб Роман Абрамович даврида катта маблағлар эвазига муаммоларини ҳал қилиб келган. Раҳбарият ҳатто катта ҳужумчиларга ҳам қараб ўтирмайди. Ўйини чиқмаса – тамом! У ким бўлишидан қатъий назар сотиб юборилади. Харид ва сотув ораси «Челси» учун узоқ вақт давомида бир қадам бўлиб келди...
Жамоа Абрамович даврида умумий қиймати 450 миллион фунтга тенг бўлган 13 та ҳужумчи харид қилганди. Улар ичида фақат учтаси – Дидье Дрогба, Николя Анелька ҳамда Диего Косталар нисбатан юқори даражада ўйин кўрсатган. Лукаку эса ўзига билдирилган ишончни оқлай олмади ва «Челси»да фаолиятининг энг ёмон даврларидан бирини ўтказди. У ҳозирга қадар АПЛда бешта гол уришга эришди, холос. Ўзининг бир интервьюсида эса жамоа мураббийининг услубини танқид остига олди. Клуб ўтган ёзда катта номни сотиб олиш орқали муваффақиятга эришишга умид қилганди. Чунки жамоа Лукакунинг нималарга қодир эканини кўрган. У «Интер» таркибида голлар уришни яхши эплар эди. «Челси»да эса яратилган имкониятлардан фойдаланишга анча қийналди ва қийналмоқда.
Томас Тухель ёзда муҳим қарор қабул қилади. У ортиқ Лукакуни жамоада кўрмоқчи эмас. Унинг ўрнига марказий ҳужумда Кай Хаверцдан фойдаланишни ният қилган. Лукакунинг жамоага келиши вазиятни ўзгартиришни талаб этарди. У «Челси»нинг юзи бўлиш мумкин эди. Аммо «катта ном» дея таърифланган ҳужумчи якунда йўқолиб қолди. Чунки Тухелнинг ўз режалари бор эди. Лукаку эса бу режалар учун тўғри келмади. Жамоа услуби Лукакуга, Лукакуники эса «Челси»га мос тушмади. Бу вазиятда Тухель ўзгариши, ЕЧЛни қўлга киритган пайтидаги услубиятидан воз кечиши, ёхуд Лукаку шароитга кўникиши талаб этилади. Ҳар икки томон ҳам ўз позициясида қатъий турди ва якунда биз гувоҳи бўлиб турган ҳолат юз берди. Бу масала ечими кимдандир «қутилиш»ни сўрайди. Кетадиган инсон эса катта эҳтимол билан Лукаку бўлади.
«Челси» раҳбариятининг ҳам бундай аҳвол юз беришида ўзига яраша айблари бор. Хусусан, улар ўтмишдаги хатолардан кераклича хулосалар чиқармади. Бундай хатонинг сўнггиси эса Лукаку эди. Клубнинг янги эгаси, у ким бўлишидан қатъий назар, аввалги раҳбарият каби чексиз молиявий имкониятлар тақдим этмайди. Чунки келаётган раҳбар инсоннинг устувор вазифаси «Стемфорд Бриж»ни ривожлантиришга қаратилади. Клубга эга чиқадиган инсондан ақллироқ бўлиш талаб этилади. «Челси» қарийб 20 йил ичида жами 14 марта мураббий алмаштирди ва Тухель янги даврга тамал тош қўйиши – жамоада ўзининг узоқ вақтлик режимини ўрнатиши мумкин.
Биз ҳам Лукаку «Челси»нинг сўнгги хатоси бўлишига умид қиламиз.
ИСМАТОВ Ж.
