Матбуот анжуманида жамоамизнинг сербиялик устози ғалабадан кўнгли тўлганини таъкидлаб ўтди.

Деян Журжевич: - Бугун уч очко олганимиздан хурсандман. Ўйиндаги асосий вазифа ҳам шундай эди. ОЧЛдаги оғир ўйиндан сўнг ва жадвалнинг сўнгги ўрнида турган жамоага қарши ўйнаш ҳамиша қийин. Сўнгги жамоа лидерга қарши очко олиш учун майдонга тушса, юқоридаги жамоа ўйиндан олдин ғалаба қозонгандек тушади. Ҳимояда рақибга имконият бермадик. Мен ҳайронман, “Андижон” бундай ўйини билан қандай қилиб сўнгги ўринда кетмоқда. Улар анча тепароқда бўлишлари лозим.

- “Пахтакор” ўтган йили шу таркиб билан анча ҳужумкор ўйин кўрсатарди. Сиз ўтган йилги ўйинларни кузатганмидингиз?

- Ҳамма мураббийниг ўз тактикаси бор. Бугун ҳужумни биз қилдик. Керак пайтда “Челси” каби грандлар ҳам ҳимоядан фойдаланишяпти.

- Жароҳат олганлар кўп. Қийин бўлмаяптими?

- Тўғри, уларнинг сони жуда кўпайиб кетди. Қийин бўляпти, шунинг учун ҳам ўйин чиройли чиқмаяпти. Ёшлар таркибида ўйинчилар кўп, лекин уларга бирданига катта юклама бера олмаймиз. Чунки таркибнинг ўзи ҳозир ёш. Балансни бир хилда ушлаш қийин.

- Бугун ҳам битта ҳужумчи билан ўйнадингиз?

- Ишонинг, агар 5 та ҳужумчи туширганимизда ва 5:0га ютганимизда мен шу ишни доим қилар эдим. Лекин шу нарсани инобатга олиш керакки, Шарофетдинов иккинчи ҳужумчи ролида ўйнади. Иракли эса ҳужум ортида. Стас ва Шерзод ҳам. Бизда амплуа бўйича битта ҳужумчи, лекин майдонда улар вазиятга қараб 2-3 нафаргача кўпаяди.