Олий лиганинг 7-туридан ўрин олган "Насаф" ва "Қизилқум" учрашувдан кейин қаршиликлар бош мураббийи Рўзиқул Бердиев уч очкони қўлга киритиш осон бўлмаганлигини таъкидлади.
"Биз ўйиндан бир кун илгари БАА сафаридан қайтиб келгандик,-дейди Рўзиқул Саъдуллаевич. Шу боис тикланиш жараёни осон кечгани йўқ. Бу ўйинда ҳам ўз таъсирини кўрсатди. Аммо шогирдларим яратилган имкониятлардан самарали фойдалана олишди ва якунда ғалаба биз томонда бўлди".
“Қизилқум” ҳам Қаршига шунчаки келмаганлигини исботлашга ҳаракат қилди. Зарафшонликлар таркибида ёш, шижоатли футболчилар борлиги ҳар қандай жамоа учун бош оғриғи бўлиши мумкин. Меҳмонларда ҳам гол уриш учун яхши имкониятлар бўлди. Лекин бугун омад бизга кулиб боқди... Албатта чемпионат аста-секин қизғин паллага кириб бормоқда".
"Кейинги турда бизни “Шўртан”га қарши қийин учрашув кутиб турибди. Ўйлайманки, бизда бу баҳсга муносиб ҳозирлик кўриш учун етарли вақт бор ва биз бундан самарали фойдаланишга ҳаракат қиламиз".
