Суперлиганинг 6-туридан ўрин олган «Сўғдиёна» – «Металлург» (2:0) учрашувидан сўнг мезбонлар бош мураббийи Улуғбек Бақоев ўз фикрлари билан ўртоқлашди.

— Ўйин ҳақида.
— Қийин ўйин ўтказдик. Намангандаги «Навбаҳор» билан ўйиндан сўнг тикланиш учун вақт оз эди. Йигитлар чарчоқ туфайли бугун ҳақиқатдан ҳам қийналишди, буни мураббий сифатида кўриб-билиб турибман. Сифатли ўйин намойиш этмаган бўлсак ҳам голлар урдик ва ғалабага эришдик. Муҳими – натижа. Кейинги учрашувга қадар тўлиқ тикланиб янада сифатли ўйин намойиш этамиз деган умиддаман. Жамоамиз аъзоларига бугунги ўйин учун миннатдорчилик билдираман.

— Милан Митровичда узатмалар хато чиқаётгани кўзга ташланмоқда. Бу борада иш олиб борасизларми?
— Тўғри, Митрович узатмаларда хатоликларга йўл қўйди. У билан дарвозабонлар мураббийимиз алоҳида иш олиб боради. Бу тўғриласа бўладиган ҳолат.

— Жамоани олдинда «Пахтакор», АГМК каби кучли жамоаларга қарши ўйинлар кутиб турибди.
— Тўғри, биз яқин кунлар ичида «Пахтакор» ва АГМК билан ўйнаймиз. Ҳозирда Суперлигада кучсиз жамоанинг ўзи йўқ, исталган рақиб муаммо туғдира олади. Биз ҳар бир ўйинга жиддий ёндашамиз.