"Ливерпуль" бош мураббийи Юрген Клопп АПЛнинг 36-туридан ўрин олган "Тоттенхэм"га қарши ўйин ҳақидаги фикрлари билан ўртоқлашди.
"Биз ғалаба қозонишимиз керак. Тўғри, "шпорлар" ҳозир дунёнинг энг яхши ҳужумкор жамоаси. Улар сафида голни ҳис қила оладиган футболчилар етарлича. Сон Хин Мин ва Харри Кейн жуфтлиги ҳақида ортиқча гап шарт эмас. "Тоттенхэм" умуман тўпга эгалик қилишда кучли клуб, аммо биз АПЛ чемпионлигини қўлга киритмоқчимиз ва бунинг учун эртага ғалаба қозонишимиз шарт", - дея Клоппнинг сўзларини келтиради Kicker.
"Ливерпуль" ва "Тоттенхем" ўртасидаги қарама-қаршилик 7 май куни "Энфилд"да бўлиб ўтади. “Қизиллар” Премьер-лига чемпионлиги учун курашни давом эттирмоқда. Клопп шогирдлари 34 учрашувдан сўнг 82 очко жамғариб, турнир жадвалида "Манчестер Сити"дан бир очко ортда қолиб, иккинчи ўринда бормоқда.
Ўз навбатида "Тоттенхэм" Чемпионлар лигасига чиқиш учун курашмоқда, "шпорлар" ҳам 34 та ўйин ўтказиб, 61 очко жамғарган. Антонио Конте жамоаси айни дамда 61 очко билан АПЛ турнир жадвалида 5-ўринда бормоқда. Улар Чемпионлар Лигаси зонасидан атиги икки очко ортда қолишди.
