Кучли бешлик чемпионатлари орасида энг кучлиси дея эътироф этиладиган Англия премьер-лигаси мавсум якунларига кўра ўз энг яхши мураббий ва футболчи номини эълон қилди.
Англиянинг "Ньюкасл" клуби бош мураббийи Алан Пардью мавсум якунларига кўра премьер-лиганинг энг яхши мураббийи номини қўлга киритди.
Ўз фаолиятида илк бор бундай юксак эътирофга лойиқ кўрилган Пардью, бу йилги мавсумда ўз жамоаси билан ҳақиқатда ҳам катта шов-шув кўтара олди.
Сўнгги тур олдидан "Ньюкасл" келаси йили Чемпионлар лигасида ўйнаш ҳуқуқини берувчи 4-ўрин учун ўз имкониятини йўқотгани йўқ. Сўнгги турда вазият тақозоси билан жамоа ҳатто учинчи ўринни қўлга киритиши ҳам мумкин. Сабаби, "Ньюкасл" учинчи ўринда бораётган "Арсенал"дан бор йўғи икки очко ортда бормоқда.
"Манчестер Сити" сардори Венсан Компани эса, жорий мавсум премьер-лиганинг энг яхши футболчиси дея эътироф этилди.
"Шахарликлар" сардори ҳам мавсумни кўтарингки руҳда ўтказди ва жамоа ғалабаларига муносиб ҳисса қўшди.
Бельгиялик ҳимоячи жорий мавсумда 30 та ўйинда майдонга тушди ва 3 маротаба рақиблар дарвозасини ишғол қила олди. Ўтган турда унинг "Юнайтед" дарвозасига урган голи, мавсумнинг энг муҳим голлари қаторидан ўрин олди.
