Бугун Россия чемпионати 2011/2012 йилги мавсумининг Биринчи дивизионда сўнгги тур ўйинлари бўлиб ўтди (юқорги саккизлик жамоалари зртасида). Бугунги ўйинлар натижаларига кўра, Владикавказнинг “Алания” клуби келаси йили Премьер-лигада тўп суриш ҳуқуқини қўлга киритди.

“Мордовия” жамоаси муддатидан аввал Премьер-лига йўлланмасини ҳал қилиб қўйган бўлса, тўғридан-тўғри иккинчи йўлланма учун “Алания” ва “Нижний Новгород” жамоалари кураш олиб боришаётганди. Сўнгги тур олдидан владикавказликлар рақибларидан 2 очко кўпроқ очко жамғаришганди. Бугунги ўйинни ушбу икки жамоа сафарда ўтказди.

“Алания” Екатеринбургда “Урал” меҳмони бўлди ва 2:2 ҳисобида дуранг ўйнади. Ўйиннинг бошида меҳмонлар ҳисобни очишган бўлса, тез орада “Урал” ҳисобни тенглаштирди. Ўйиннинг 90+3-дақиқасида Санжар Турсунов жамоасининг иккинчи голини киритди ва гўёки “Алания” ушбу ўйинда ғалаба қозониши кутилаётган вазиятда, майдон эгалари пенальтидан ҳисобни тенглаштиришди. Ушбу ўйинда Марат Бикмаев захирада қолдирилди.

Москвада “Торпедо” меҳмони бўлган “Нижний Новгород” эса кутилмаганда йирик ҳисобда имкониятни бой бериб қўйди — 0:3.

Натижада “Алания” 97 очко тўплади ва Биринчи дивизионда 2-ўринни эгаллаб кузда бошланадиган мавсумдан бошлаб Премьер-лигада тўп суришни бошлайди. Биринчи дивизионда 3 ва 4-ўринни эгаллаган “Нижний Новгород” ва “Шинник” жамоалари эса Премьер-лигада 13 ва 14-ўринни эгаллаган жамоалар билан ўтиш турнирида иштирок этишади.