Навбаҳор"-"Динамо" (1:1) учрашуви якунига етгач, ҳар икки жамоа мураббийлари ўртасида матбуот-анжумани бўлиб ўтди. Дастлаб Аҳмад Убайдуллаев журналистларнинг саволларига жавоб берди.
Аҳмад Убайдуллаев ("Динамо" бош мураббийи): Шогирдларимнинг ҳаракатидан умуман қониққаним йўқ. Натижа ҳам бизни хурсанд этгани йўқ. Бундай ҳакамлар ўзбек футболининг ривожига болта уришмоқда. Бунақа ҳакамликдан норозиман.
- Ҳакамларга қандай эътирозингиз бор?
- Ўзларинг кўрдиларинг. Ҳакамларнинг хатоларини айтолмайман.
- Учрашувни бошқарган ҳакамлар мезбонларга ҳам ноҳақлик қилишдику?
- Бунисини мен билмайман. Сизлар яхши биласизлар.
- Дурангдан қониқмадим деяпсиз. Унда нега қўшимча дақиқаларда ўйинчи алмаштириб, вақт чўзишга ҳаракат қилдингиз?
- Менми? Белгиланган алмаштиришларни истаган пайтда амалга оширишим мумкин! Ёки ундай қилмаслигим керакмиди? Футболчим чарчаб қолганди, ўрнига янги куч тушурдим.
- Нега жамоа мағлуб бўлган пайтда ўйиндан кейинги матбуот-анжуманларига ташриф буюрмайсиз?
- Қачон? Ана, ўзим кирмасам ҳам, ёрдамчиларим иштирок этишяптику! Тўғрисини айтганда, мен рус мактабини битирганман ва ўзбек тилида равон сўзлаша олмайман. Яхши гапира олмаслигим учун анжуманларга кирмайман! Сабаби шу!
- Иван Нагаев - Сизнинг ҳақиқий шогирдлаингиздан бири. Лекин унинг фойдаси ҳужумнинг олд қисмида кам тегмоқда, назаримда. У балки ҳужум ортида фойда берар?
- Йўқ, Нагаев фақат соф ҳужумчи бўлиши мумкин. Ундан яхши тўпурар ҳужумчи чиқади. Яратилган имкониятлардан тўлиқ фойдалана олса бас.
- "Навбаҳор"нинг ўйини Сизда қандай таассурот қолдирди?
- "Навбаҳор" доим менга ёқиб келган. Бу жамоага ҳурматим баланд. Жамоа характер кўрсата олди. Умуман, мезбонлар ёмон ўйин кўрсатишмади. Уларнинг "Олмалиқ" билан кечган учрашувини кўрдим. Наманганликлар 9-10 киши бўлиб ҳам чиройли ўйин кўрсатишди. Агар таркиб тўлиқ бўлганида "Навбаҳор" ғалаба қозониши ҳам мумкин эди. Мана, "Бунёдкор"ни мағлуб этишди. Бугун эса жамоа ўйини у қадар қовушгани йўқ.
