"Тоттенхэм" "Ювентус" вингери Деян Кулушевски ва "Аталанта" ҳимоячиси Кристиан Ромеролар билан шартнома имзолайди, дея хабар бермоқда журналист Фабрицио Романо.
Манбага кўра, "шпорлар" жамоанинг муҳим қисмига айланган икки футболчини сотиб олиш учун 80 миллион еврога яқин сармоя киритади.
Кулушевски “Тоттенхэм”га 2022 йилнинг январида келиб қўшилган. Бу вақт ичида у барча мусобақаларда 19 та ўйин ўтказиб, 3 та гол урди ва 8 та голли узатмани амалга оширди. Ҳуқуқий жиҳатдан "Ювентус"га тегишли бўлган 22 ёшли швециялик футболчининг нархи 35 миллион еврога баҳоланмоқда.
Ромеро Лондон клубида 2021 йилнинг августидан буён ўйнамоқда. 24 ёшли аргентиналик футболчи клуб сафида барча мусобақаларда 30 та ўйинда майдонга тушиб, битта гол уришга муваффақ бўлган. Бу футболчининг нархи эса 40 миллион еврони ташкил қилади.
