Клуб футболкасини ўғирлаган "Рома" мухлиси "Моуриньо эффекти"ни мисол қилиб келтириб, ўзини оқлади.

Конференция лигасининг ярим финалидаги ғалаба бутун шаҳарни ҳаяжонга солди. Ҳаяжон шу даражага етадики, мухлислар ўзини ноўрин тута бошлади. Рим марказидаги клуб дўконидан бир мухлис футболка ўғирлаб кетди, деб хабар бермоқда Corriere dello Sport.

У ўзини оқлаб, полицияга қуйидагича кўрсатма берди: "Моуриньо қўл остидаги "Рома" мени ақлдан оздирмоқда - биз Конференция лигаси финалидамиз. Мен ўзимни ушлаб тура олмадим”, - деди "Рома" клуби мухлиси.

Хабарда айтилишича, полиция 29 ёшли эркакни қўйиб юборган ва либос дўконга қайтариб берилган.

"Рома" ва "Фейеноорд" жамоалари ўртасидаги Конференция лигаси финали 25 май куни Тиранада бўлиб ўтади.