Навоийнинг "Қизилқум" клуби Суперлиганинг жорий мавсумини ёмон бошламаганди. Бироқ, сўнгги турларда Никола Лазаревич шогирдларининг ўйинларида бироз пасайиш кузатилди.

9-турда "Қизилқум" футболчилари Қаршига сафар уюштиришди ва "Насаф" жамоасидан оз эмас, кўп эмас, нақд бешта гол қабул қилиб олишди.

5:0 ҳисобидаги мағлубият навоийлик раҳбарларга оғир ботди шекилли, жамоа бош мураббийи - Никола Лазаревичнинг курсисини "қимирлатиб" қўйишди.

ЎзПФЛ раҳбари Диёр Имомхўжаев бугун ўзининг телеграмдаги каналида "Суперлигадаги иккинчи истеъфо яқин. Кимдир олдидан оқаётган сувнинг қадрига етмаганди" деб пост қолдирди.

Бизгача етиб келган маълумотларга қараганда, "Қизилқум" раҳбарлари Никола Лазаревич ўз лавозимидан четлатишади.

"Қизилқум" ортда қолган 9 турнинг 4 тасида ғалаба қозонди, икки марта дуранг ўйнади ва 3 та учрашувда мағлубиятга учради.

Эслатиб ўтамиз, аввалроқ Суперлиганинг жорий мавсумдаги биринчи истеъфоси "Бунёдкор" томонидан қабул қилинганди ва Шуҳрат Мақсудов эгаллаб турган лавозимидан озод қилинганди.